Omupeduminista mounisteli wouhaku nonghalonawa Dr Esther Muinjangue ota hokolola ta ti moshilongo omu na omiti da wanena okutunhila ovanhu ombuto yoCovid-19 paife.
Pefimbo a ninga eenghundafana naKundana Etitatu Muinjangue okwa popya ta ti ounimisteli wouhaku otau twikile nokukala tau ningi oshikonga shetunhilo opo u kale wa xwaxwameka ovanhu va ka tunhilwe.
Okwa yelifa ta ti Namibia okwa yakula omaludi omiti dokutunhila ombuto yoCovid-19 okudja koilongo ya yooloka, omo natango Namibia a teelele okukala a pewa omiti detunhilo loCovid-19 okudilila koilongo imwepo.
“Ohandi kungulile oshiwana opo shi kale sha ka tunhilwa ombuto yoCovid-19 shaashi omukifi ou owa nyika oshiponga. Osha fimana ngeenge omunhu okwa tunhilwa ombuto ei shaashi oha kala e na omhito i li pedu yokukala a kwatwa kombuto,” Muinjangue ta ti.
Muinjangue okwa ti oshiwana nashi xulife po okukala tashi tandaveleke ouyelele woipupulu kombinga yovenda yokutunhila ovanhu ombuto yoCovid-19.
Okwa ti ovanhu nava kale tava topolelafana ouyelele kombinga nghee sha fimana ngeenge omunhu a vendwa, shaashi eshi otashi tu ovanhu omukumo opo va kale ve na eudeko lokutunhilwa.
“Omwaalu wovanhu tava kwatwa kombuto yoCovdi-19 tau ende wa uka pedu efiku nefiku paife, nomafyo ovanhu tava fi koCovid-19 okwa shuna pedu. Eshi otashi yandje efano liwa kombinga yomalihumbato ovanhu shaashi oinima otai ende ya uka kouwa paife,” Muinjangue.
Okwa kwandjangela ta ti ombuto yoCovid-19 otai lwifa ashike ngeenge ovanhu tave liufa komilandu edi da tulwa po dokukelela etandavelo lomukifi.
Okwa popya yoo vali ta ti moipangelo, nokomandi ouhaku paife kaku na sha vali ovanhu vahapu ve li kepango loCovid-19 shaashi ovanhu ovanini tava kwatwa kombuto.
Okwa weda po ta ti Namibia okwa didilika e na omwaalu wovanhu muhapu va veluka kombuto yoCovid-19.