Marythar Kambinda

KATIMA MULILO – Tibelelo yakuyahiwa kwamukwakwa wasinyehelo yamasheleñi alikana bolule bamianda isilezi (N$600 million), ili ozwa Namalubi-Isize-Luhonono use ufelile, mi sokwalulezwi limotikala. Purojekiti yamukwakwa onungahanya Luhonono kwatolopo ya Katima Mulilo nekalile mwasilimo sa 2015, kamaikuto akubata kunungahanya libaka zamabala amuunda, zene kauhelwa kwalisebelezo kanako yamuunda ni litabula. “Luwabezwi kuli seluyemi fa97% hala kufela kwamukwakwa. Lusweli kufelelezafeleleza, mi kwamafelo akweli ya Yenda luitekela kukwalula mukwakwa simubuso.

Purojekiti neli yetata luli, kabaka lakuli kiyapili kuyahiwa mwamabala amuunda,” nekubulezi muzamaisi wakatengo kakabona zakuyahiwa kwamikwakwa Conrad Lutombi. Naelelize bakwaezi kuambuka lubilo sina mukwakwa hausali omunca. “Lulemuhile kuli halukwalula mukwakwa kuli limotikala lifite, kubanga ni mafu afamukwakwa. Kacwalo kikwabutokwa kuli lueleze bakwaezi kuli mwamukwakwa wo, kuna ni limunanu zeñata. Kacwalo kikwabutokwa kuli bakwaezi banga mihato yasilelezo, kuli balatelela milao kakusa kwaeza kufiteleza tikanyo,” nekuelelize Lutombi. 

Mukwakwa walibima zemashumi aketalizoho kazepeli noyahilwe kikampani ya Nexus. Mi kalulo yapili kuzwa Namalubi kuya Isize nefelile mwasilimo sa 2019, mi nokwalulezwi limotikala. “Nekuli tata kono lwataba kuli lufelize mwamasheleñi ane alumelezwi. Kipurojekito yene tokwa masheleñi amañata, yene sika ezahala kale kuzwa naha ilukuluha. Luitumela kwamubuso kakusula masheleñi, ili puluko yetuna yekatusa batu babapila kwamukulela wamukwakwa wo,” naekelize. Mukwakwa hauna kutusa feela bayahi baLuhonono kono ukatusa bayahi kaufela balibaka zamabala amuunda, mwalilanda zaKabbe yaMutulo ni Mbowela, hamoho cwalo nikunolofaza nzila yakuya naha Zambia. 

Hala mukwakwa waImpalila Lutombi naize muyahi sali kwateñi, mi sakalile kukenisa mokafita mukwakwa. Katengo hape kapatehile kuswanisa zamukwakwa ozwa Nakabolelwa kuya Kasika. “Mulelo kikunungahanya sioli sa Impalila kwanaha kaufela kakusebelisa Kasika. Kacwalo purojekiti yelatelela ikaba kuzwa Nakabolelwa kuya Kasika. Halutalima zibo yelufumani kakuyaha mukwakwa mwamabala muunda, kakuli kwanu nekuli tata, bakeñisa bukaufi ninuka ya Lyambai. Luikutwa kuli kwalineku lani kulumbile,” nekubulezi muzamaisi. Muyemeli wasilalanda sa Kabbe yaMutulo Bernard Sisamu nasakoni kupata tabo yahae, mi naize mukwakwa ukatisa zwelopili yene ilibelezwi mwalilalanda zepeli zaKabbe.