Gumwe gadivikwa muhudisi Jackson Babi nkera kagusirepo ehundiro lyendi lyopangenderera eli gatuliremo muhahende gwendi Kadhila Amoomo kompanguro zekeguru sivike esi sina puko omu gahundilire asi ngano vahamukwata ntani vahaza vakakona kone embo lyendi nalinye morwa tayikara ngwendi kapisi paveta.
Siruwo tupu sooso ana kugava muhahende Harald Geier ndi ana kuza asi apurakene koumbangi, Amoomo yige katuliremo ehundiro olyo, lyokutanta asi mukaro ntani yokugava komupanguli ntoni, vaporosi vaNamibia ntani mupanguli gopontambo ozo zomukunda gwaGobabis, ava kavatente asi kapi tavatambura noureru ehundiro lyangoso. Mkululi Khupe ntani Nixon Marcus ava kavakere asi awo kuna karerepo malimburuli mokukwama ntumwaraka zomupanguli ntoni. Babi kahere asi makonakono aga vatuliremo ndi varugene vakarerapo makona kono momazuva 28 Kudumonkuru vagatarurure nokugatulira ntere.
Age simpe kahere asi ngendeseso ezi kavaruganesere vapanguli womoGobabis vazitulire ntere ntani omu kavagendere vamukwate nayo vahepa kuyigusapo morwa kapi yina kuliza nediveta lyosirongo. Age simpe kahere asi ngendeseso omu vana kumugusa mononkwate ntani veta ezi zina kuyapulisira vamukwate unene moVenduka kukwama omu mupanguli Samuzala Samuzala kapi kayiwepe.
Mokiukwama mwendi, ekwato lyendi ntani makonakono kavarugene membo lyendi kapi yina kutanta Yuma, morwa kapi kayisikiremo asi pontambo zokugazara asi age mulingilingi noveta zoukorokotji kapi kavazikweme.
Babi nomugazarera mukwawo Friza Naululu Dumeni, ava kava kere asi nawo vamwe mowo ntantatu kavakwete mokwedi kwaKudumonkuru morwa kavakere nonombinga dasimpanda, awo kuna batamba eseso kupira kusikisamo kukeverera veta zokutakamesa yikorama ntani kukara noyikutji mositata saVenduka, moGobabis Babi kuna mutamba yokusana yikorama eyi vasilika ntani evango nalyo kwalisilika.
Vvali ava simpe kuna kara mononkwate apa nye kava kamonekere rokuhova kompanguro. Vaporosi kavatente asi nombinga edi kuna kumoneka asi kavakadigwene kosimpanda sakara monofarama domoGobabis.
Siruwo oso Babi kakamonekere kompanguro moGobabis makura epanguro lyendi kavalirundwilire dogoro mo 15 Sitarara yipo simpe makonakono gatwikire.
– rrouth@nepc.com.na