Khuta Yepahami nepwacize kupo yaputako yamushemi wamuuna, yana bata taelo yakuhanisa mwanahae wamusizana kuli asike ayobulukwa mabapa nibabañwi, babane bane batimezi mwakozi yafamukwakwa yene ezahezi mabapa ni Kongola, mwasikiliti sa Zambezi viki yefelile. Kasamulaho akuteleza kwataba busihu bwa Labulalu, Muatuli Hannelie Prinsloo napwacize kupo ni litifo, nikuzwisa taba famukoloko walitaba zakhuta nikubulela kuli
ifelile. 

Mabaka ane atisize kuli afe katulo yeo akapatalazwa kachenu la 17 Sope.

Shelton Chainda, ili ndatahe Twambo Chainda walilimo ze16, natisize kupo yaputako Labulalu, kamaikuto akuli takazo yahae yakuyo buluka mwanahae kwamunzi waMakanga nesika utwiwa kibalubasi lwa Nzundamo (kwasimuluha mahe musizana). Twambo natimezi la 5 Sope hamohocwalo ni mahe Namangolwa Nzundamo walilimo zemashumi amane, muhulwana mahe yene ili muzamaisi swalelele wakampani yaNamdock, Heritha Nankole Muyoba walilimo zemashumi aketalizoho kazepeli. Yomuñwi yana timezi neli Nekaro Kasiku walilimo zelishumi kazepeli, ili munyana Twambo.

Mwana muyoba wamusizana Amy Manga Sepiso walilimo zemashumi amabeli kazepeli, nimwana Nzundamo wamusizana walilimo zetalu nebabandukile kozi. Piho yasipokola ibulelela kuli liwili lakwamulaho lanzohoto neli pazuhile, ili taba yene itisize kuli mukwaezi alatehelwe kamaiso mi motikala kihaipindumuka
hañatañata. 

Mwakupo yahae Chainda nabata kuli khuta ihanise lubasi lwa Nzundamo lone luetelezwi kiPatrick Nzundamo – malumahe Namangolwa – ni Alfred Kabala – malumahe Namangolwa mwamabasi – kuzwelapili kuyobuluka kwamunzi waMazungendaba. 

Nabata hape kuli lubasi lwa Nzundamo lumefe pampili yene mulumelela kuyozwisa situpu kwalibulukelo la sipatela, nikuli khuta ife taelo yakuli ayo buluka mwanahae kwa Makanga. Lubasi lwa Nzundamo nelulwanisa kupo yeo. Patrick ili yana yemela lubasi, naize nihaike nekubile ni tumelelano yene ezahezi la 6 Sope kuli Twambo ayo bulukwa kwaMakanga, lubasi hamoho cwalo ni Chainda nebabile ni mukopano omuñwi la 8 ni 9 Sope. Mukopano woo soyofeza kuli Twambo ayo bulukwa mabapa ni mahe ni babañwi kwa Mazungendaba. 

Patrick natolokile kuli kupo yakuli Chainda ayo buluka mwanahae kwa Makanga nehanilwe kakuli “nasika lifa mulatu wamwanahae, sina yena ni Namangolwa hane basika nyalana. Taba yeo izamaelela ni mulao wasizo mwasikiliti sa Zambezi, kuli haiba batu habasika nyalana muuna yasika lifa mulatu hana maata kumwana yoo.” Natolokile hape kuli bakeñisa kuli Namangolwa ni bashemi bahae nebalisiyo, neli yena yomuhulu mwalubasi yana filwe maata akuketa kuli Twambo uyo bulukwa kai. Kepelo yabaketalizo nebile teñi Labune. 

Chainda nayemelwa kiAppolos Shimakeleni, mi lubasi lwa Nzundamo neluyemelwa kiAmbunda-Nashilundo ni Jermaine Muchali.