NGOMA – Muuna walilimo zemashumi aketalizoho kezelobañwi yana zibahalizwe kuba Moses Luyanga Musialela, nalatehezwi kibupilo bwahae, hana taselizwe kikubu hane afuluha mukolo mwanuka yaKasaya, mwasilalanda sa Kabbe ya Mbowela mwasikiliti sa Zambezi. “Napulusizwe nikumatisezwa kwasipatelanyana sa Itomba, teñi ayo timela hane alibelezi motikala yasipatela. Situpu sahae nesi isizwe kwaLuhonono kone siizo iswa kwalibulukelo kwaKatima Mulilo,” nekubaleha piho yasipokola. 

Kezahalo yesituhu ne ezahezi Labutanu la 4 Yowa 2022 kanako ya 17h58, kwamunzi waKasamu mwasilao sa Ikaba. Musialela nabulukilwe viki yefelile. Lipatisiso libonisa kuli ona lifolofolo zepila mwamezi ze libulaya batu babalikana 500 kasilimo mwa Afilika, mi lizibahala kakuba ni buhali ni kutaseza zefita molipila. “Kuakalezwa kuli nyandi, kanako yakutasezwa nasila nuka ni mukolo, mi kubu yamutaseza kwanuka ya Kasaya kwana bata kusila,” nekubulezi mapokola.