WINDOKO – Mueteleli wanaha Hage Geingob ulumbile likopano zelwanisana zene ezize hande mwaliketisa za likiliti ni litolopo zene felile cwalecwale, mi naize kopano yahae ika sebeza ni zona. Kopano yebusa ne teuzwi mwalibaka zecwale ka Windoko, Orangemund, Luderitz, Swakopmund ni Walvis Bay, sihulu kwalikopano za IPC ni LPM. “Luyaha naha, lu utwile sicaba, sina hamu iponela linepo lizwile, nelu lutilwe tuto mwalibaka za litolopo. Kono sina haili naha yelukuluhile, Swapo iamuhezi linepo, halusikaya kwa khuta, lufitisa tumbo kubane batuzi,” nekubulezi Geingob. Geingob nalatuzi mabulatwi akuli muuso oetelezwi ki kopano ya Swapo ukatima likopano zelwanisana masheleñi. 

“Kwa mabulatwi ali lukatima likopano zelwanisana masheleñi, taba yeo hai yeleli ni muuso wa Swapo. Lusebeleza sicaba sa Namibia. Lusebeze, ne mufile lisepiso ki nto yende kuba kwalineku leo, ni kasebeza ni mina, ni mi lakaleza matohonolo,” nakenisize. Nabulezi kuli liketisa zene ezahezi mwahala likweli zelishumi kazepeli, sicaba sa Namibia sibulezi, mi sikupile kuli baeteleli basebeze katata. “Luba utwile, mi kacwalo luna ni kusebeza kaswanelo, kuli lutise cinceho yeswanela. Ni haike kamaiso itokwa ciseho, mi musebezi waluna kikutisa zwelopili mwanaha yeswalisana. Lu alabile pizo kusebeza mwalinako zetata ze,” nekubulezi mueteleli wanaha. Naize manzwi ahae kakuba mueteleli walipolitiki ki kutahisa swalisano, kozo ni zwelopili.