New Era Newspaper

New Era Epaper
Icon Collap
...
Home / Muuso uikopanya nibalipisinisinyana mwa Zambezi

Muuso uikopanya nibalipisinisinyana mwa Zambezi

2022-10-31  Staff Reporter

Muuso uikopanya nibalipisinisinyana mwa Zambezi

Marythar Kambinda

 

Muuso ukalile mungendenge wakuzibisa batu balipisinisi bunde bwatumelelano yakufundota mahala mwa Afilika (AfCFTA).

Likola la lipisinisi ni litekisano kaswalisano ni katengo kalitekisano kaNamibia, ni katengo kakabona zazwelopili kaUNDP, nebaikopanyize nibalipisinisi mwa Katima Mulilo viki yefelile. 

Mulelo wamukopano neli wakuikabela litaba kuamana ni tumelelano ya AfCFTA, hamohocwalo nikulemusa sicaba kuamana ni tumelelano ni zende zetiswa kitumelelano. Mwasitatimende sene abalezwi kiSofia Nambahu, mueteleli waUNDP mwanaha Namibia Alka Bhatia naize tumelelano yakatengo kaAfCFTA ina nisepiso yende mwa Afilika, sihulu mwakuhulisa Namibia nitekisano ni linaha zaAfilika.

Nabulezihape kuli katengo kaAfCFTA kana nikolo yakukona kuhulisa mayemo alipisinisinyana, ni kuzwisezapata kuhulisa sifumu katekisano ni puluko, nikutahisa sifumu sesi hulile nikutiya mwa Afilika. 

“Katengo kaUNDP mwaNamibia kasebeza katata kutusa kutaleleza milelo yaAfCFTA mwanaha, kakundongwama lipisinisinyana, sihulu zeo lietelezwi kibasali ni babanca,” nabulezi. Katengo kaUNDP kana ni mulelo wakuzibisa ni kulemusa babanca ni basali babalikana 250 kuutwisisa AfCFTA, nikubona kuli baitenga nikuikola miselo yateni. Katengo kaUNDP hape kafa lituso zamasheleñi kwalipisinisinyana zemyanda yemibeli, kulitusa kuhula nikueza hande mwalitaba zalitekisano. 

Mubusisi swalelele wasikiliti sa Zambezi ni muyemeli wasilalanda sa Kabbe ya Mbowela Bernard Sisamu naize tumelelano ina ni zende, mi ikona kutusa tahiso yamisebezi ni zeñwi cwalo. 

“Sicaba sa lipisinis mwanaha Namibia siswanela kusebelisa hande hahulu zefiwa kikatengo kaAfCFTA. Sihulu sikiliti hasi eza hande mwalitaba zalipisinisi, kutwisiso sakata wazeo lifiwa kikatengo kaAfCFTA ikatusa sikiliti kuitenga kuzende zetiswa, nikuba ni kabelo mwakuhula kokunde,” nekubulezi Sisamu. Limembala zeñwi zalipinisi mwasikiliti bane bali kwamukopano nebaize kutokwa masheleñi, hamohocwalo ni batu kusaziba zebalekisa kizeñwi zabutata bobufofalisa lipisinisi zabona.


2022-10-31  Staff Reporter

Share on social media