Marythar Kambinda

KATIMA MULILO – Yene ili muzamaisi yanasa pumuzi famusebezi Gallen Mazila Kolokwe, nailo bulukwa kwamunzi waMuyako mwasilalanda sa Katima ya Matakanyani viki yefelile. Natimezi ana nililimo zemashumi asilezi kazelobañwi, la 21 Mbuwana mi nafilwe kepelo yasimubuso kiMueteleli wanaha Hage Geingob. “Lipilu zaluna lilobehile halunze luutwisisa lifu le, nihakulicwalo, mwamatomolapilu aluna, luitumela hala bupilo bone bupililwe katundamo, lyano ni tisezo. 

Kachenu kakuikuhumusa lulemuha mi lukuteka ni kulumela kumuhaboluna Kolokwe, kakuli neli muuna yana talelelize musebezi wahae mwalinzila zeñata,” nekubulezi Geingob mwamanzwi ane abalilwe kimubusisi wasikiliti saZambezi Lawrence Sampofu. Yene ili Mueteleli wanaha Hifikepunye Pohamba, ni Mueteleli wapili wanaha Sam Nujoma nibona nebafitisize manzwi akulumba Kolokwe, mi nebamupakile kuli kuba muzamaisi mwasisole yanana nitundamo, ni muyemeli yana siiile kabubo mwasisole sanaha Namibia. 

Kolokwe nakile akena mwamutayi wasisole sakopano yaSwapo (Plan) one ulwanela kulukula naha Namibia kasilimo sa1975. Nakile afumana lituto zahae zasisole kwaOshatotwa mwanaha Zambia. Pili asika biziwa kuzwa mwandwa kasilimo sa1976, ili kuli ayo ituta kwasikolo sanaha Namibia sakatengo kaUN, ukile alwana lindwa zeñata mwahala 1975-1976. Kiyomuñwi wabalwani baPlan bane bakeni mwasisole sanaha Namibia kasamulaho atukuluho, mi napahami falituto mane kuyofita fabuzamaisi. Usiile musalahae, bana basilezi ni baikulu cwalo.