Muzamaisi wakatengo katolopo ya Katima Mulilo Raphael Liswaniso ubulela kuli membala wakatengo kakayemela sicaba ka Affirmative Repositioning (AR), ili yakulubelwa kuli namunatile, watakana mi kisikatazi. Liswaniso ukulubelwa kuli nanatile Mukendwa Simasiku kwakatengo katololopo viki yefelile. Kono nalatuzi kuli nanatile siezwa, kono ubulela kuli nalikile kueleza Simasiku kuzwa mwaofesi yahae, kasamulaho mukopano wabona ukamba mwamisunga. Naize Simasiku akala kubonisa mahanyi ni kumulwahaka, mi nazwisizwe feela mwaofesi katuso yamubeleki yomuñwi.

Muyemeli wasicaba ubihiwa kuli naile kwaliofesi zakatengo katolopo kuyo laela kuli afiwa mapampili asupeza zwelopili yakomponi ya Green Valley, hamoho cwalo ni mapampili atumelelano ni katengo katolopo. Sibuabui wasipokola mwasikiliti sa Zambezi Kisco Sitali nabulelezi New Era kuli taba yanombolo 70/05/2021 yakunatiwa, nekwalulezwi muzamaisi wakatengo katolopo. “Mubilaeli uakaleza kuli nafwembilwe ki Liswaniso, mi mwakuitundanisa siapalo sahae sibulelwa kuli nesi pazuhile. Kanako yacwale hakuna yatamilwe,” nekubulezi Sitali.

Sibuabui wakatengo ka AR mwasikiliti sa Zambezi Mwemba Mwemba nabulelezi New Era kuli Simasiku yana ile ni babañwi naile kwakatengo katolopo kuyo kupa mapampili, nikuyo buza kana nebalumelezwi kusindeketa likwambuyu wazwelopili yalibaka zalitolopo ni matakanyani Erastus Uutoni kwalikomponi zatolopo. “Habayo fita kwaofesi yamuzamaisi swalelele Mapenzi, sebayo fumana Liswaniso, ili yana kalile kusebelisa manzwi akushubula Simasiku aswanasina kuli ‘wena kwena, utile kuto ezañi kwanu? Hanina kulumelela kwena kwanu’. Bane bamusindeketile sebaiketela kusaya ni Simasiku. Kubulelwa kuli muzamaisi nacincize muhupulo ni kubalumelela kuli bakene,” nekubulezi Mwemba.

Mwamukopano matapa sakala kukalauka. Muzamaisi wakatengo katolopo ubihiwa kuli kiha nata muyemeli wasicaba ñindi ni kumulambela mwamulala. Liswaniso nalatuzi likakalezo zeo, mi naize namuelelize feela kuzwa mwaofesi lika halinyambwanaleka. “Muchaha watakana mi kisikatazi yabata taba yeinyani kuli aisebelise. Ukalile kale inge ani kataza, anze ani sheununa ni babeleki kaufela bakatengo katolopo. Ubulelelanga batu kuli yakamuswala, uka mukwalulela taba yabubangoki, kuli katengo katolopo kamulife,” nekubulezi Liswaniso. “Ukataza babeleki bakatengo katolopo. Uya kwaliofesi anze alaela kuli afiwe litaba, babeleki haba mualaba, wabalwaha nikubafumbela.  

Lizazi leliswana nelu lizelize mapokola, habato fita nasa bandukile. Nihaiba taba yana izo kwalula neli yakubukeleza mipingo yahae yemaswe, Liswaniso nabulezi, kakuekeza kuli sebabata kuyo kupa taelo yakuli ahanelwe kuya kwaliofeso zabona. Simasiku hape ubihiwa kuli una nitaba yesa zekwa ili yana fumbela kuholofaza muyemeli watolopo. “Neni sika munata. Mane kiyena yana bata kulueza maswe. Nanata falitafule, nahuwelelize ni kululwahaka,” nekubulezi Liswaniso. Katengo ka AR kabulela kuli kaka libelela kubona kuli muyemeli watolopo, ni bayemeli babañwi bakatengo baka eza cwañi muzamaisi wakatengo katolopo, hala kunata membala wasicaba. Kusicwalo basabisa kuli bakanga
muhato.