New Era Newspaper

New Era Epaper
Icon Collap
...
Home / MVA fund a ninga ehongo lokutauluka opate kovanafikola

MVA fund a ninga ehongo lokutauluka opate kovanafikola

2021-09-28  Festus Hamalwa

MVA fund a ninga ehongo lokutauluka opate kovanafikola

Ehangano lo-MVA Fund ola ninga oshikonga shokuyandja ehongo kovanafikola ngeenge tava tauluka opate pofikola Akuniihole Primary School mOmandaxa.

Elalakano loshikonga okukwashipaleka kutya ovanafikola ova mona ouyelele wa wana kombinga yokulongifa opate.

Ovanafikola ova pewa oulapi vokudjala hava vema ngeenge tava tauluka opate efimbo keshe, opo va kale tava monikila kokule kovashingi veetuwa.

Okwa didilikwa ovanafikola vomofikola Akuniihole va ninga oihakanwa yokulyatwa keetuwa ngeenge tava tauluka opate unene tuu ounona ve li meendodo dopedu ovo vamwe hava lyatwa keetuwa, naashi osha eta opo MVA Fund a kale a ninga oshikonga shokuhonga ovanafikola okukala tava tauluka opate pefimbo tava i ile va dimbuka kofikola. Ounona okwa li tava pewa omadeulo nghee ovanhu hava tauluka opate mondjila, omo kwa li ku na omunambelewa wopolifi ta ulikile ounona okutauluka opate.

Moshipopiwa shaye omukulunhu wopolifi moshitukulwa shaShana Rauha Amwele okwa ti okwa pandula MVA Fund eshi e na oshisho novanafikola nokukala a kwashipaleka kutya eemwenyo dounona vofikola oda amenwa pefimbo tava tauluka opate.

Amwele okwa ti oshikonga eshi otashi ka kwafela ovanafikola vahapu nosho yoo ovakulupe vopomudingonoko Akuniihole.

Okwa ti opolifi yomoshitukulwa shaShana otai kala tai ningile ovashingi omakonakono opo va kale tava tali ka ngeenge ova longifa omalodu shaashi vati okwa didilikwa ovashingi vamwe ve hole okushinga ve li koshiyodungo yomalodu.

Okwa ti oshikonga eshi otashi twikile okuningwa keefikola dikwao edi di li popepi nopate opo ovanafikola va kale va pewa ouyelele nghee ve na okutauluka opate.

 

Amwele okwa kunghulila ovakwashiwana opo va kale tava longele kumwe nopolifi opo ku kelelwe oiponga yomeendjila.

 

Omukulunhu koshikondo shokukeelela oiponga yomeendjila Sidney Boois okwa popya ta ti MVA Fund ota twikile okukala ta yandje ehongo keefikola adishe edi di li popepi nopate.

Okwa popya ta ti MVA Fund ota lalakanene kutya ovanafikola ova amenwa koiponga yomeepate ngeenge tava tauluka opate.

Okwa ti ombelewa yaye oya kala nokudidilika ounona veli meendodo dopedu va ninga oihakanwa yokukanifila eemwenyo davo popate i li puAkuniihole, omanga vamwe ova mona oiponga.

Okwa kunghulila ovashingi veetuwa opo va kale tava fimaneke eemhango domopate efimbo keshe.

“Eemwenyo dovanafikola oda fimana, ovanafikola ovo ovaleli vokomongula onghee otwa hala ounona vofikola aveshe va kale ve li meameno ngeenge tava i kofikola ile tava di kofikola,” Boois ta ti.

Moshipopiwa shaye omukulunhufikola waAkuniihole Olivia Hipondoka okwa pandula unene MVA fund eshi a tota po oshikonga eshi shokuyandja ehongo kovanafikola.

Hipondoka okwa ti ofikola yavo oya kala ya taalela oupyakadi wounona ve li meendodo dopedu hava lyatwa keetuwa pefimbo ngeenge tava tau luka opate.

Okwa pandula ongudu yokulwifa oimbuluma yoMen and Network eshi ya hai kala tai yakula ovanafikola ngeenge tava tau luka opate.

Okwa yelifa ta ti ounona vonafikola vo pofikola Akuniihole veli omuhoyi ova lyatwa keetuwa, omo veli vatano kanifila po eemwenyo davo omanga veli vanhee ova mona oiponga. -fhamalwa@nepc.com.na


2021-09-28  Festus Hamalwa

Share on social media