Festus Hamalwa
Omufitaongalo wongeleka yoEvangelical Baptism Church in Namibia Laban Mwashekele ota ti osha fimana ngeenge ovaholafani ve linekelafana shaashi eshi otashi kale ke po ombili nekwatafano liwa pokati kavo.
Okwa ti ngeenge ovaholafani kave na elinekelafano pokati kavo ohashi dulu okueta oinima ii ngaashi okuteya eehombo, okulidengafana ile oiponga yomafyo.
Naashi otashi etwa eshi ngeenge ovanhu tava kala a lushe tava tanguna meumbo shaashi kapena elinekalafano liwa pokati.
Edi Mwashekele okwe di popya Etitano eshi a ninga eenghundafana naKundana a hokolola ta ti okulinekelafana naku kale oshinima shotete mohombo ile kovaholafani ve na ediladilo lokuhombola.
“Ngeenge pokati kovaholafani ka pena elinekelafano itava dulu okukala tava topolafana oiholekwa yavo shaashi keshe umwe okwa tila mukwao kutya pamwe ota ka popya oshiholekwa shaye kondje,” Mwashekele ta ti.
Onghee okwa kunghilila ovanhu vahombola ile ovo ve li mekwatafano lopaihole opo va kale ve linekelafana noshoyo okutopolafana oiholekwa yavo shaashi eshi otashi tungu ekwatafano liwa pokati kavo.
“Ngeenge ovanhu meumbo inave linekelafana ita pa kala pena onakwi iwa yokutungafana pokati kovaholafani. Onghee osha fimana ngeenge tava longele kumwe noshoyo okukala va kwatela po ekwatafano liwa efimbo keshe,” Mwashekele ta ti.
Okwa weda po ta ti okulinekelafana ota ku eta yoo vali opo ovaholafani va kale va fimanekafana meni nokondje yeumbo.
“Ngeenge meme ile tate ina ve linekelafana meumbo eshi otashi eta opo va kale a lushe tava tanguna pokati kovanhu shaashi kapena ou e na elinekelo mu mukwao eshi a lushe ha pa kala umwe e wete mukwao oye e na epuko,” Mwashekele ta ti.
Mwashekele okwa weda ta ti elinekelafano ola fimana yoo vali pokati kovanhu ve na oukaume noukahewa opo va dule okukala ve na ekwatafano liwa.
“Oshiwana nashi kale tashi fimaneke oiholekwa ya vakwao. Oshiwana nashi kale shina ohokwe yokulinekelafana opo shi kale shina elongelokumwe,” Mwashekele ta ti
Okwa kunghilila oshiwana opo shi kale tashi ka konga omakwafo kovafitaongalo ovo ve na owino yokulonga oipambelele yeehombo.
“Otuna ovafitaongalo ngaashi Shapaka Shakapolo, Bishop Lukas Katenda naHafeni Mwaningange ve li longekida efimbo keshe okuyakula ovaholafani ve na oupyakadi,” Mwashekele ta ti.
Mwashekele okwa ti ovaholafani nava kale a lushe hava di minafana po ngeenge pena umwe a ninga nai mukwao shaashi ediminafanepo oli li oshitopolwa shokulinekelafana.
Okwa ti otava lalakanene okuyambidida oshiwana eshi sha pumbwa ehongo nouyelele kombinga yonghalafano yopaihole opo va xulife po onghalo yovanhu tava dipayafana ile ovanhu tave li kufa eemwenyo.