Omushingi wobesa yomalweendo ya shivika nawa moshilongo, okwa mangululwa komhangu yaTsumeb konima yelifutilemo loN$1200 mOmaandaxa.
Gabriel Joseph (48) okwa li kwatwa po mEtitatu loshivike sha dja ko eshi a hangika noupateke vomakaya oYes ve li 750 ve li pongushu yoshimaliwa N$15 000 noshoyo oipateke yomalodu yoWhiskey 2 360 ili pongushu N$11 800.
Omupopiliko wopolifi moshikoto Inspector Ellen Nehale okwa ti oinima aishe ya kwatwa po kumwe oili pongushu N$26 800.
Joseph okwa kwatelwa peinda lopolifi pOshivelo konima eshi opolifi ya hada mobesa. Konima yeemwedi da pita ovalumenhu vavali navo ova kwatwa po eshi va hangika ve na oupateke vouWhiskey 87 ve li pongushu yoshimaliwa N$8 700 noupateke vomakaya 944. Opolifi oya ti okwa didilikwa oshiwana hashi kwatwa nomakaya noshoyo omalodu ngeenge tashi di konooli shauka koushimba opo shi ka landife.
Opolifi oya ti oshiwana shokonooli oshi hole oku kalanda ouWhiskey kOshikango kondado yopedu ndele tava ka landifa koushimba kondado yopombada.
Onghee naashi osha heta opo oovene vendingosho koushimba va kale ve na ohokwe yokufa ouWhiskey kOshikango shaashi vati ohava landwa nawa moushimba.
Opolifi oya kunghilila oshiwana opo shi xulife po okuvakela oinima oyo ina i pitikwa okuya pita peinda opo shi li kelele okuninga oihakanwa yo kuya modolongo.
Onghee ovashingi veelefa otava kunghililwa opo va kale va kotoka ngeenge tava pewa oinima va twalele koushimba shaashi meendjato oha mu kala oinima ya nyika oshiponga.