Omulumentu gwomimvo 51 okwa holoka mompangu nena sho ta tamanekelwa omahepeko gomomagumbo.
mauyelele gwopolosi moshitopolwa shaShikoto Ellen Nehale omulumentu ngoka anuwa okwali a dhengagula okanona kokandhona komimvo 18 nokukamanga nomalyenge mothingo.
Oshiningwanima shoka anuwa osha holoka momukunda Onekaku momudhingoloko gwOshigambo mehuulilo shiwike.
Okanona hoka anuwa okali ka ningi okanelago sho kwali ka yambindhindhwa mbala komushiinda ngoka a li ekuuvu sho taka kugu.
Otaku hokololwa kutya okanona hoka okali ka ndhengwa ku hekulu tango noongonyo, nomankawo oshowo okuthangagulwa shinyanyaleka.
Anuwa omulumentu ngoka okwali eka manga mothingo, eka mangela momuti nelyenge e teka thigi miihwa moka taka kugu.
Okanona hoka anuwa okali ka tsikile okukuga sigo omushiinda teya okuka kwathela.
Nehale okwa hokolola kutya okanona hoka anuwa oke na oondjokonona yoku hepekwa ku hekulu.
Oshiningwanima shoka okwali sha lopotwa kopolisi meendelelo nomulumentu ngoka okwali a mangwa po.
Okanona hoka oka ka mona uuhaku koshipangelo shaNandjokwe.
Opolisi oya ndhindhilike omahepeko taga ningilwa aanona momagumbo ga yooloka taga indjipala.
Otaku kumagidhwa oshigwana shi kale aluhe tashi lopota iiningwanima ayihe kopolisi yili popepi opo kukuthwe onkatu yo meendelelo.
Opolisi oya ti aanona naya fatululilwe oompango nuuthemba gwawo momagumbo, opo ya kale taya lopota kehe shoka ye wete kaashi li mondjila.
Ta yiti oyendji oya taalela omahepeko ga yoolola momagumbo ihe oye na uumbanda woku ga eta puuyelele.
Nehale ta gwedha po kutya aanona naya koneke kutya omaupyakandhi nomahepeko ngoka otageya ashike pehuulilo uuna taga lopotwa.
Opolosi moshitopolwa shaShikoto natango omumvo gwa piti okwali ya lopotelwa omahepeko gaanona posikola Iipundi Combined.
Aakuluntu yaanona okwali ya nyenyeta kutya aanonona oya taalela omashongo okuza kaalongi sho kwali ye ya zaleke ooshako komalutu gawo
Otaku hokololwa kutya aalongwa mboka okwa li ya zalekwa ooshako dha shangwa “Ondi mukolokoshi omanga dhimwe dha shangwa ondi na omulumentu”.
Aalongwa anuwa okwa li ya lombwelwa kaalongi kutya naya zale ooshako ndhoka uule woshiwike shimwe, onga egeelo lyawo.
vkaapanda@nepc.com.na