Ehangano lyoku gandja ombinzi, lyoNamibian Blood Transfusion Service (NamBTS), olya kumagidha oshigwana shi iyambe oku gandja ombinzi, opo ku hupithwe oomwenyo dhaantu yeli miipangelo.
Omuwiliki mehangano ndyoka Titus Shivute okwa popi kutya, oya ndhindhilike ombinzi ya shuna pevi moompungulilo dhehangano lyawo, shoka tashi kala uupyakandhi kwaamboka taya ka pumbwa okuyambindhindhwa nombinzi uuna ye yi pumbwa. ‘’Opelesenda ashike yimwe yaantu hayi iyamba okugandja ombinzi momvula ayihe, ihe oshilongo osha pumbwa omaludhi goombinzi ga yooloka omumvo nguka” ta ti ngaaka.
Shivute ta kumagidha oshigwana ta ti, nashi kambandhale okuyambindhindha okwi iyamba ombinzi opo ku vule okuka hupithwa oomwenyo dhaantu omvo nguka. Ta ti, opo ombinzi ya pumbiwa yi gwane NamBTS okwa pumbwa okugongela ombinzi yithike 160 kehe esiku.
“NamBTS okwa gwedhako oopelesenta 9.5% moku gongela ombinzi omvo gwayi,’’ ta ti ngaaka. Ta popi ta ti, oshigwana nashi koneke kutya ombinzi ihayi etwa po, ihe ohayi zi momuntu ena omwenyo opo yi vule okulongithwa, onkene oshina okuningwa okuza kesilohenda lyomuntu ye mwene.
Shivute natango okwa popi kutya ombinzi ohayi pumbiwa kaanumvu ya yooloka miipangelo, onkene ngele kayi po okuyambindhindha aantu mboka otashi ka eta omakanitho goomwenyo ogendji.
“Otwa ndhindhilike kutya oyendji ohaya yambindhindha no kwiiyamba nombinzi pethimbo aashona, ihe ngele oya koko ihaye shiningi we,’’ ta ti ngaaka.
Ta gwedhapo kutya otashi wa pala ngele oshigwana tashi kala noku yambindhindha, okwiiyamba ombinzi nando iikando yili ne momvula. Ta ti, okwiiyamba kombinzi uupyakadhi uunene wa taalela ehangano lyoNamBTS, onkene otaya pandula mboka ya kala no taya tsikile okushininga okukwathela mboka taya ka pumbwa ombinzi, uuna yeli muuwehame wa yooloka tau pula eyambindhindho ndyoka.
Ombinzi oyuuthwa okugandjwa kaantu yena omimvo okuza 16-65, ominete ashike 30. Ombinzi ohayi gandjwa poosenda dha yooloka oondolopa ngaashi, Walvis bay, Swakopmund, Ondangwa oshowo Oshakati. NamBTS okwa kumagidha wo omahangano ga yooloka moshilongo oshowo oomandiki opo ga kwatathane nayo ya vule okweeta omakwatho ngoka po pepi, opo aanilonga ya vule okwiiyamba ombinzi.
Omutoolinkundana koshifokundaneki Infomante mOngwediva, Maria David okwa popi kutya okwa yambindhindha nokwiiyamba ombinzi oshoka okuna olukeno noshigwana shaNamibia.
“Atuheni tuli kombanda yevi, aamwayinathana onkene otwa pumbwa okuyambindhindhathana nonando komalupe katushaathane,’’ ta ti ngaaka.
Ta ti, okuuviteko elongitho lyombinzi, onkene ota kumagidha oshigwana shi kuthe onkatu nena etashi ka iyamba okugandja ombinzi.
Ta gwedhapo ta ti, ngula omupambele goye go popepi taka pumbwa ombinzi moshipangelo, ihe itayi kalamo oshoka inoyi gandja.
vkaapanda@nepc.com.na