KATIMA MULILO – Likwambuyu yabona zakwanda naha mwanaha Botswana Lemogang Kwape, ni likwambuyu yasweli situlo sesiswana ili hape mubakweli kuNgambela wanaha Netumbo Nandi-Ndaitwah, nebanyatezi pampili yatumelelano mwa Katima Mulilo Labutanu. Kunyatelwa kwapampili nekulatelezi kasamulaho makwambuyu bababeli nebabile mwalingambolo zamazazi amabeli, kamulelo wakubata kukutisana lipilu kulatelela mafu abayahi banaha Namibia babalalu ni muyahi wanaha Zambia, mwamazoho amasole banaha Botswana mwakweli ya Njimwana ñohola. Linaha zepeli neli lumelelani kuli likana liikabela limbule zefumane mabapa ni museto walinaha zepeli. 

“Kikwabutokwa kuli kuba ni tumelelano ni kubupa katengo kakainelezi, kakakonisa babeleki bamulao mwalinaha zepeli, kusebeza hamoho kuli lifosi lino tamiwa ni kuzekiswa. Kitaba yabutokwa kakuli linaha zaluna zepeli halikoni kulumelela bubangoki,” nekubulezi Nandi-Ndaitwah. 

Likwambuyu walitaba zakwanda naha wanaha Botswana naize patisiso yeka ezwa kikatengo kakaikemezi hala mafu amandui babalalu, ili bayahi banaha Namibia ni muzwale wabona ikalile. “Halulati kuli kube niyapila aikalezwi, lubata kuli kube ni kuombalala… mi kitakazo yaka kuli kozo ni sepo, lilato ni mukekecima zebileteñi mwahala linaha zaluna zepeli lika tula,” nekubulezi Kwape.  Hala litumelano mwapampili yene nyatezwi, linaha zepeli neli lumelelani kuli bayahi basikiliti sa Zambezi ni basikiliti sa Chobe kilusika luliluñwi nikuli baikabela limbule zecwale kalitapi, mezi, mataka ni mafulelo alikomu. Kacwalo kikwabutokwa kuli limbule zeo zabukelezwa. 

Nebalumelelani hape kuli kube ni kutwano hala sicaba ni baeteleli basizo mwalinaha zepeli. Nebabulezi hape hala buitamo bwa linaha zepeli kusebeza hamoho kubupa silikani sakata nikupila mwakozo hamoho.