Walvis Bay-varugani ava vakara asi yiwo venya Swagga.com, sitora esi sakara asi yiso asi randesa mudwaro gokukurupa nononkaku, moWalvis Bay ngesi kuna kara asi kuna kusikona kona momunene. Namibia Revenue Agency (NamRA) komisare Sam Shivute nkera katente kosayitunga zaNew Era, apa kavamupuragerere asi varugani ava kavalitumbwire vene asi Pamela Smith, age ogu gumwe kavamugusire pevango olyo morwa kuna karapo tanko makonakono.
Makona kono aga kwagatulisapo poopo vatungimo momukunda gwaWalvis Bay, ava vageve masivano mokwedi kwaKudumonkuru, mvhura zina puko, vakere nomapuro asi ogu NamRA, yinke gasigirako esi sitora saSmith namugara gwendi vapire kusitjeka, omu yina kara asi yitora yopo pepi nayinye ayirandesa yininke yahana asi paveta kwatjekamo, nye ava vavali sawo kapi vazamo vataremo namo yirandeswa yahana asi momukaro gomuwa yina kara. ‘’ Munamberewa ogu kwamugusa pevango lyendi, ano makona kono neyi tuna kuhuyunga ngesi kuna kutwima. Nye twahepa kudiva asi nkenye gumwe kuvhura kumugazarera umbondo, makura yiyo nye yina karere mulyo asi twahepa kukona kona tukare noumbangi neyi natuza nye komeho asi yinke yokuruganako, kukwama oyo tuna gwana, yimo ana kutanta Shivute, siruwo oso kavamupuragerere vana mbudi mo Walvis Bay. Smith kwakara asi yige atara nkenye eyi yina kuwiza mosirongo, ogu gakara asi ngano yige nye yatumbukira mokutara asi mwaha wiza mosirongo yirandesa eyi vapira kupulisira.
Kuna kumoneka asi venya sitora ava kwagwene mbudi asi mungura takukara makona kono morwa opo vayasikiremo mositora sawo mwaKudumonkuru, yininke yawo yimwe vana yigusamo vana kahoreka. Nye kuna kuzuvhika asi sitora mudima ezuva olyo kwapete, makura yitora yovamusinda kwayitjekere, yina kara asi Nike ntani Puma. Ano konyima sitora oso yiyo sayapaturika hena. Smith apa vamugwene nye mwaKudumonkuru, kwapatanene asi age kapisi murugani gwaNamRA, ano mugara kapi gadivireko Yuma asi efukunyo lina kukarako. Makura kumwe nokudimisa funguna zendi. ‘’ Ame yiko nina zi kositora oso nayina ngurangura,. Kuvhura opure vantu vange avaruganako, ewa karapo nawa Smith, omu yina kumoneka sitora sina pata ntani pomakende kwaturapo yimbapira. Nye awo kwarugene ezuva olyo lyakere asi efukunyo. Ano nye nampili ngoso apa katupulire Shivute katente asi nkenye gumwe gahepa kusikisamo veta. ‘’ Nampili ngoso veta zaNamibia zomutero, kwagava mpito asi nkenye murugani yinke yamutumbukira apa ava nyatere malizuvho, vahepa kutanta eyi waweka, eyi twarugene natuvenye. Kuvhura nye kuyirugana ngoso nsene asi muntu ogo kapi ana tura yininke yendi poruzera, ndi kapi ana hara kusikisamo veta, neyi agwana nsene asi vana yimugwanene. Eyi kapi yakara tupu asi kovarugani vaNamRA, nye kwakara asi nkenye murugani,’’ yimo ana kutanta Shivute.