New Era Newspaper

New Era Epaper
Icon Collap
...
Home / Namwater a londodha aanooli ya teke omeya

Namwater a londodha aanooli ya teke omeya

2023-03-02  Victoria Kaapanda

Namwater a londodha aanooli ya teke omeya

Ehangano lyokwaandjaneka omeya miitopolwa yokonooli Namwater, olya tseyithile omalelo goondoolopa miitopolwa Oshana, Ohangwena nOshikoto kutya oye li metifa okulonga ondama yomeya, uupyakadhi mboka tau kala tau patitha omeya.

Omukuluntuwiliki gwopokathimbo melelo lyondoolopa lyOshikoto, Simon Nghuulondo, okwa londodha aakalimo yomoshitopolwa shaShikoto ya longekidhe omeya sho taga ka kala taga pata okuza moshiwike tashi ya.

“Omeya otaga ka pata okuza momasiku gaheyali sigo omulongo gaMaalitsa. Otaga ka kala haga pata okuza pontano yongula sigo omulongo guusiku,” ta ti ngaaka.

Nghuulondo okwa ti, uupyakadhi wepato lyomeya otau etithwa kondama yomeya ndjoka tayi longwa mOshakati.

“Otatu indile oshigwana shi idhidhimikile onkalo ndjika yuupyakandhi womeya omasiku ngoka ge li gane,” ta indile ngaaka.

Ta ti, otaya ka tseyithila wo oshigwana ngele ondama ya pu okulongwa nenge ngele opwe ya natango uupyakadhi wumwe tau vulu okwiindjipaleka omasiku gokulonga ondama ndjoka.

Uupyakadhi womeya owa tameke nale mOshitopolwa shaShana okuza mehuliloshiwike, sho omeya ga li ga pata.

Omunambelewapitithi omukuluntu melelo lyondoolopa yaNgwediva Jackson Muma okwa ti, uupyakadhi wepato lyomeya owa tameke mehuliloshiwike.

“Omeya otaga kala taga pata, unene okuza pomugoyi guusiku sigo ohamano yongula,” ta ti ngaaka.

Ta ti, uupyakadhi owa etithwa kondama ndjoka hayi andjaneke omeya miitopolwa yokonooli, pethmbo ndika tayi longwa.

Muma okwa kumagidha wo oshigwana shi longithe omeya nawa pethimbo ga pata oshowo okukala sha pungula omeya omanga ondama tayi pu okulongwa.

“Otu li mekwatathano naanambelewa yokoNamwater, notatu ka tseyithila oshigwana uuna ondama ya pu okulongwa,” ta ti ngaaka.

Ta ti, shoka itashi holoka ashike mOngwediva, ihe nokoshitopolwa shaHangwena.

Ondoolopa yaShakati nayo oya taalela uupyakadhi wa faathana womeya taga pata.

Aakalimo yomOshakati nayo oya londodhwa yi indhindhimikile onkalo ndjoka omanga tayi ti po nawa.

“Elelo lyondoolopa nalyo nali kale tali tseyithile aakalimo yawo, ngaashi oondoolopa oonkwawo tadhi ningi, opo tu kale hatu ilongekidhila onkalo ndjoka okuya ombaadhilila,” Thomas Ndilula omwoopaleki gwiihauto ta nyenyeta ngaaka.

Ta ti, Osoondaha ya zi ko okwa li a mono ashike omeya ga pata omanga a kalelwa kiihauto mbyoka e na okwoopaleka.

Ta gwedha po ta ti, Osoondaha olyo esiku lyi na ookasitoma, oshoka oyendji ihaya yi kiilonga, lyo olyo ethimbo hali monika koyendji okuyogitha iihauto yawo.

vkaapanda@nepc.com.n


2023-03-02  Victoria Kaapanda

Share on social media