Minista guuhaku nonkalonawa omukulu Bernard Haufiku okwa ti, mboka taya popi kutya omupeviprimaminista Netumbo Nandi-Ndaitwah okwa kulupa oya puka, oshoka shoka kashi shi uupyakadhi.

‘’Ope na aanyasha ye li moondholongo omolwa ya longa uulingilingi, nayamwe oya longa iilonga iiwinayi, kandi wete oomvula dhi na sha nokulela,’’ta popi ngaaka.

Haufiku okwa ti, omuleli ongoka ta vulu oku eta omalunduluko, okukandula po omaupyakadhi oshowo ha vulu okupulakena komanyenyeto gaantu noku ga kandula po.

Ta ti, shoka okwe shi mono muNdaitwah, onkene oku na omukumo kutya ngele okwa pewa ompito yokushunako kuupevipresidente, otaka fala oshilongo shika ponkatu yimwe komeho. Ta gwedha po kutya ita popi ngaaka ta tumbaleke Ndaitwah, ihe oku na omukumo kutya ota vulu.

“Oshilongo shika osha taalela uupyakadhi, shoka itashi holekwa, onkene shoka shi na okuningwa po okulongela kumwe nuudhiginini opo shi ze mo muupyakadhi moka,” ta ti ngaaka. Haufiku ta ti, ongaashi kwa ndhindhilikwa kutya aanyasha oyendji oya thigi po ongundu tayi lele momahogololo ga zi ko.

Ta ti, shoka inaye shi ninga sho yi ihole yoyene nenge ya hala oompito mongundu moka, ihe oye shi ningi sho ya sholola kwaashoka tashi dhana onkandangala mongundu yoSwapo, inaaye shipanda.

‘’Opo tu galule eitaalo lyaamboka ya sholola, out na okulonga twi itula mo, nokukwashilipaleka kutya otwa lundulula. Swapo oku na natango oonkondo oku uvitha ko oshigwana,’’ ta popi ngaaka. Ta gwedha po ta ti, shika otashi holoka ashike uuna aaleli taya longele kumwe nokutotha mo uupyakadhi tau shunitha oshilongo monima. Haufiku natango okwa totha mo Sophia Shaningwa kutya omuulikwa a opalela ompito yuuhamushangandjayi.

‘’Shaningwa ota vulu okupewa oshinakugwanitha shoka natango oomvula ntano komeho. Otandi popi ngiika nda tala kwaashoka a longo oshowo omakwatathano a ningi methimbo talele poompito a longo,’’ ta popi ngaaka.

Ta ti oku na omukumo muye, naShaningwa ota vulu oku eta elunduluko moshilongo muka, noyendji otaya ka za mo moluhepo.

Ta gwedha po kutya, mboka ye shiwikile uulingilingi, inaya pumbwa okupewa oompito dhokulela nando sigo aluhe. -vkaapanda@nepc.com.na