Mwakubata kuankufisa ni kutiiseza silikani salipisinisi mwahala Namibia ni Angola, likwambuyu walitaba zakwanda naha Netumbo Nandi-Ndaitwah cwanuñu uka etelela sikwata sabalipisinisi kuya mwanaha Angola kuyobata puluko yalipisinisi. Nabulezi zeo kanako yakutabela lituto zabulishumi kazene za The-Ben Gurirab hala mutomo, “Munyako oliba mbowela waAfilika (SADC): Kulwalula Kolo yalipisinisi mwasikiliti sa Zambezi”. Naize liluko lahae litamehile kutusa kukwalula nzila yalipisinisi ni linaha zeñwi mwaAfilika (AfCFTA).

 “AfCTA yasebeza. Isusueza babaipeleka kuhulisa Afilika. Tekisano mwahala linaha zaAfilika yasusuezwa hahulu. Mulelo oyelela niwo kimusipili onikanga kuya mwanaha Angola mwamazazi asikai ataha, mi ni lakaza ni kutabela kuli babaipeleka mwasikiliti sa Zambezi baiñolisize kuli luzamaye hamoho,” nabulezi. Naize ye kimemo yekwalulezwi batu kaufela baba eza lipisinisi mwanaha Namibia, kuiñolisa kuli baye ni sikwata kuyo bababaza lipisinisi zabona mwanaha Angola. “Haluyeli kuyo kupa. Luya kakuba balikani babasebeza hamoho. Muswanela kuziba zemubata kuyo babulelela. Muswanela kuziba zemubata. Kitaba yatulo kumañi ni mañi. Haiba hamuna mulelo muka belekela mulelo wababañwi,” naelelezi balipisinisi.

Tumelelano yaAfCFTA nekalile la 30 Kandao 2019, mi Namibia kiyeñwi yalinaha zese nyatezi kale tumelelano. Kiyeñwi yamilelo ya 2063, ona ni kolo yakuhulisa lipisinisi mwaAfilika. Kacwaloo likwambuyu ulumela kuli sikiliti sa Zambezi, nihasili kwahule ni likiliti zeñwi zanaha, kono siipa miseto ni Zambia ni Botswana mane cwalo nikuba mabapa ninaha Zimbwabwe siswanela kundumbwama mwalipisipisi zefumaneha mwalinaha zeo. Natiiselize kuli kutahisa sifumu kuswanelwa kutiswa kibabanca mwaAfilika kuli mulelo wa2063 utalelezwe. “Luswanela kutisa zwelopili mwalifasi la Afilika. Hakuna yaka eza cwalo, kwanda luna,” nekuhatelezi likwambuyu. Nasepisize kuli muuso wanaha Namibia ungile mihato yabutokwa hala kuhulisa lico ni bupoti, mi ukazwelapili kukwalulela balipisinisinyana ni balimi nzila yakuhula.