Namibiab ge ai!gû garu ǀgapi tsēkorobe hâ ǀgapi !gôagu coronas ǂhīgudi tsî ǁōgu dis ǀkha. ǂOa ge wekheb !gôagu ǀkhab ge Namibiaba, Gamaǀaeb !aroma ǀgui 243 Covid-19 ǁōga ūhâ tsî nēsi ǀhaob ai 1 073 ǁōgu ai mâ. 

ǂOa ge wekheb Wunstaxs 33 ǁōga xu gu ge 12 ǂKhoandawes, 11 ǀAeǁgams, ǀgamna Tsoaxubams, tsî ǀguiǀguise Tsumeb, Kaiǀaub, Otjiwarongos, Okakararas, Tsaraxa-aibes, Katima Mulilos, Oshikukus tsî Tsandis !aroma. 

ǁNā 33 khoen hîa ge ǁōǂoana xun ge 27 !khāǁkhaesa tama hâ, ǀgui-i ge ǂguro !khāǁkhaes Sinopharm-i disa ūhâ tsî nau koron ge a ǀūsa. Nē mâsib xab ge ǂurusib ministeri, Dr Kalumbi Shangulaba, ǁîb di ǂâiǂhansensa khoen hîa Covid-19 !khāǁkhaede ū tama hân ǂnamipe gere gowaǂui. 

!Khāǁkhaesa ūs ge sa soros di !kham!oas ǁkhāsiba ra ǀgaiǀgai tsî ǁkhauba coronasa hōs !oagu. 

Hanats nî !khāǁkhaesas kara, os ge kaise ǀaesen tsî ǀae-omǂgâsa ra ǁkhauba tsi. 

ǁNā-amaga ta ge ra ǀkhomma in !hūǁîna ǁîn di ama tama ǂgomde ūǁnâ !khāǁkhaede xu, tsî ǂhanuse aitsama dī-ūsen tsî !khāǁaesa ū,” tib ge gere ǀkhomma. ǁKhā !gôakhâigu !oagun ge nē 33 khoena xu 29 ǀnai ǀnî ǀaena ge ūhâ i tsî hakan ǀguina ǀkhara ǀaena ūhâ tama ge hâ i. 

Nē ge ǁōǂoan hoan ǁaegu i ge ǁî-e ǂkham i khoe-i ge ge 26 kurixa i tsî hoan ǁaegu kai i-e ge 93 kurixa i. 

Wunstaxs aib ge Namibiaba 2 075 ǀasa Covid-19 !nae!khaide ǁnāpa ge !âihe 5 823 khoena xu ge !nuri hîa 36% ǂhīgude ra ǂnûǁkhaebase. 

ǀAeǁgams ge hoan xa a ǀgapi !gôab 1 128 !nae!khaide tsēs !nâ ge !nuri. ǁKhāti ge !nurihes ge 95 476 khoen ge ǂguro !khāǁkhaes Sinopharm-i tsî AstraZeneca-i disa a !khō!oasa, ǁnāpan ge 17 215 khoena ǀgamǁî !khāǁkhaedi Sinopharm-i tsî AstraZeneca-i dide a !khō!oa hîa. 

Namibiab ge 796 khoen hîa ge ǂuruna ǀasase ge !nuri tsî 11 678 khoena noxopa soǀôadīsens !nâ hâse.

ǀHaob !gôab Covid-19 Namibiab !nâ ǂoa ge wekheb kōse ge hōse ge !nurihe khoen dib ge 69 096 ai mâ. 

“!Âide dīs ge a ǂhâǂhâsa, ǁnāpa xu ǀgui da ǀasa ǂhīgudi tsî mâpa xu di hâs tsîna a !khari ǁkhā amaga. Namibiab ge nēsi ǀgamǁî !haros ai Suid Afrikaba sao hâse ǀgapi !gôaba ūhâse ra !nurihe.