Ehangano loRoad Authority (RA) nalo ola kumwa konghalo yoCovid-19, no itali dulu manga oku wanifa po omayakulo aeshe.

Meenghundafana a ninga naKundana omupopiliko woshikondo shoyeendifo shoRoad Authority Hilen Fillemon okwa hokolola ta ti mopaife ngaha omayakulo mahapu okwa ya manga mokafudo.

Okwa ti ovanailonga vamwe otava longele komaumbo opo kukelelwe etandavelo lombuto ei, onghee paife oilonga yavo otai ende kashona.

Fillemon okwa ti omayakulo ngaashi oku yandja omikanda dotete edi hadi yandjwa manga inaku yandjwa omukunda wokushinga okwa kalekwa manga keembelewa davo moshilongo aishe.

Okwa yelifa ta ti oyuyeemo yehangano nayo oya shuna pedu shaashi ovanhu ihave u ya vali momwaalu munene oku konga omayakulo keembelewa davo ngaashi sha kala shito. 

“Oshikondo shoyeendifo nasho otashi kwashipaleke kutya otashi li ufa komilandu doCovid-19 ngaaashi naana omutwe woshilonga a tula po elombwelo eli. Onghee nafye otwa pata manga oku yandja omayakulo amwe po, opo tu kelele etandavelo loCovid-19,” Fillemon ta ti.

Fillemon okwa ti noilonga yo ku tunga eepate nayo oya ya mokafudo manga, ashike onghalo ngeenge oya shuna kouwa oilonga ihapu otai ka twikila natango.

“Mopaife ngaha otwa taalela eshongo loilongifo ina i wana, ngaashi omashina oku ninga omikanda dokushinga amwe po okwa teka ashike otwa kala nokumbesitelo omashina aa kondje yoilongo ndele fiyo onena inaa fika,” Fillemon ta ti.

Okwa denga omufindo ta ti ovanhu ashike ava vapumbwa omayakulo omeendelelo tava ka kwafelwa pefimbo eli.

“Oshiwana ngeenge tashi ya keembelewa detu nashi li ufe komilandu doCovid-19.