Kansela woshikandjohoololo shOmulonga Erickson Ndawanifa okwa eta po omalunduluko mahapu kombinga yomayakulo neputuko moshikandjohoololo shaye.
Meenghundafa a ninga naKundana Ndawanifa ou e li oye omunashipundi welelo lopashitukulwa mOhangwena okwa ti moshitikulwa shaHangwena omu na oshikefa sha totwa shedina Community Development Fund.
Kansela okwa ti elalakano loshikefa eshi okukwashipaleka kutya ovakalimo aveshe ve li moshitukulwa shaHangwena ova mona omayakulo ngaashi olusheno, omeva, eepate dopashinanena, omatenda onetwork.
“Oshikefa eshi ohashi ongele oshimaliwa opo shi longifwe eemhumbwe domoikandjohololo aishe yomoshitukulwa shaHangwena,” Ndawanifa ta ti.
Kansela okwa ti omikunda dihapu di li moshikandjohoololo shaMulonga mopaife ngaha odi na omeva okoupomba.
“Onda tungifa oupangelo vahapu moshikandjohoololo ngaashi okapangelo kokEhoma, kEngela nako okwa tungwa okapangelo kape ke na nolusheno nokuli,” Ndawanifa ta ti.
Ndawanifa okwa ti okwe shi pondola opo a tule olusheno momikunda dihapu domoshikandjohololo shaye ngaashi Epoli, Outwilo, Etope, Okashipili nosho tuu. Okwa hokolola ta ti oshikandjohoololo shaMulonga osho shimwe shi li sha kula, shi na omwaalu wovanhu vahapu nomikunda di li 67 okufaafanifa noikandjohololo imwepo yomoshitukulwa shaHangwena. Okwa ti oundingosho ve fike po40 ve li moshikandjohololo shaMulonga ove na olusheno mopaife ngaha.
Ndawanifa ta ti etenda lomakwatafano lo-MTC ola tungwa kOnamahoka eli paife tali yandje omakwafano komikunda dopushiinda ngaashi Oshatotwa, Oshimumu nosho tuu.
“Ohandi ka tula moilonga eeprongalama dihapu dovanyasha edi tadi ka kala di li kombinga ounamapya. Onda faneka opo ovanyasha vaka pewa omadeulo nghene ve na okweeta po oikunino yavo opo va kale tava landifa oikonomwa,” Ndawanifa ta popi.
Kansela okwa hokolola kombinga yomashongo oo eli moshikandjohololo shaye ngaashi okuhe na oitaashi yopolifi, eepate dopashinanena nando okwa popya kutya odili eshongo lakula moshikandjohololo shaye.
Pexulilo Ndawanifa okwa kunghulila oshiwana shomoshikandjohololo shaye opo shi kale tashi longele kumwe nombelewa yaye. Okwa ti ombelewa oyo shiwana onghee nashi kale shamanguluka oku popya nakasela kombinga yemhumbwe davo.