Victoria Kaapanda

Kakutu komatanga gopolisi yaNamibia Sebastian Ndeitunga okwa kumagidha aalumentu ya kale taya sile aanona yawo oshimpwiyu, ihe haku ya thiga ashike miikaha yooyina.

“Aanona ohaya koko mombepo ombwaanawa uuna ya tekulwa kaakuluntu yawo ayehe, nomikalo oshowo nelandulathano,” ta fatulula ngaaka.

Ta ti, ootate oya pumbwa okulela aanona yawo, opamwe nooyina yaanona, okukeelela aanona mboka ya hulile momapandaanda yo ya ninge iihakanwa yiikolitha oshowo iingangamithi.

Ta fatulula kutya aanona ngele ye li miikaha yayina, kaape na eyambidhidho lyahe, oyiina ohaya ka nyengwa, naanona ohaya ka landula oondjila dha puka. 

“Onkalo ndjoka otayi ngushupaleke omuthigululwakalo gwetu, aalumentu naya kale ye na oshinakugwanithwa naanona yawo,” ta popi ngaaka.

Ta ti, oya ndhindhilike kutya, yamwe oya thigi po oohombo iikando oyindji ya pitilila ihe omolwoohole dhiifundja.

Ndeitunga okwa li a popi ngaaka esiku oshitopolwa shaShana sha li sha mono omukuluntu gowpolosi omupe, Naftal Lungameni Sackaria mOmaandaha.

Shoka okwa li e shi popi sho ta gandja oshiholelwa a ikwatelela komukuluntu gopolisi omukulu, Rauha Amwele konima a li a tothamo kutya natango oye li pamwe nombili nomusamane gwe konima ya li ya tulwa kumwe omimvo odhindji dha piti. 

Ndeitunga okwa li wo a popi esiku ndyoka kutya okwa mono komalungula sho oomeme taya tanga Sackaria, ihe shoka hasho a endela ihe okwa endela okulonga nokugwanitha po iilonga ye.

“Ino kala wu na naakiintu mboka, ihe gwanitha po iilonga yoye,” Ndeitunga a kumagidha ngaaka.

Sakaria okwa li a pewa oshinakugwanithwa shokulela onga omukuluntu gwopolosi moshitopolwa shaShana, sho a pingene  po Amwele ngoka a li a kala noshinakugwanitha shoka noshokulwitha iimbuluma mOshana omimvo heyali dha piti.

“Oshinakugwanithwa shika nda pewa, otandi ke shi gwanitha po ngaashi naana nde shi inekelelwa, okulwitha iimbuluma oshowo okutula po elandulathano,” Sackaria ta ti ngaaka.

Ta ti, otaka longa nuundhiginini, noonomola dhawo otadhi ka gandjwa mombepo opo oshigwana shi vule okudhenga aluhe uuna pe na uupyakadhi.

Sackaria okwa ti okwa mono omahaleloyambeko agehe komalungula ga gandjwa koshigwana okuza koombinga noombinga dhoshilongo, ngoka ta ka longitha okulonga nuundhiginini.

“Ngame omusamane ndi na ezimo lyandje, ihe shoka ohandi shi kaleke kokule niilonga yandje,” ta popi ngaaka.

Okwa totha mo kutya okwalongo iilonga yuupolisi omimvo 26, miitopolwa ya yooloka moshilongo no oompito dha yooloka oshowo oonzapo dhokiiputundhilo  dha ya yooloka.

Amwele okwa yi moshipundi shevululuko momasiku 31 gaJuli nuumvo.

Omukuluntu gwopolisi omukulu okwa popi ta ti, ina thiga po iilonga omolwa a loloka ihe oshoka ethimbo olya thika.

“Ndika olya kala eyithano lyandje, onga okulonga iilonga yuupolisi, okutula po elandulathano oshowo okulwiitha iimbuluma, onkene ote pandula oshoka ondjodhi yandje oya tsu,” ta popi ngaaka.

Ta ti, nonando a thigi po ombelewa, oku li ashike okankatu okashona kokule nuuna mboka a thigile oshinakugwanitha ya pumbwa eyambidhidho, okwa manguluka aluhe okuyakula.

“Otandi thigi po iilonga mbika nenyanyu nombili, nonda hala wo Sakaria a tsikile iilonga mbika nohole ngaashi twa kala nayo,” ta laleke ngaaka.

– vkaapanda@nepc.com.na