Omukuluntu gwopolisi moshilongo Sebastian Ndeitunga sho a li a talele po oshitopolwa shaMusati okukwashilipaleka uukumwe nelongelokumwe pokati koongamba dhaNamibia nAngola, okwa li a popitha Aangola ya gongala pEtunda.

 Ngoloneya gwoshitopolwa shaMusati Erginus Endjala okwa ti, Ndeitunga natango okwa li a talele po nokutala onkalo ya taalela aaniilonga yetanga lyopolisi moshitopolwa shaMusati. Ta ti, omukuluntu gwopolisi okwa li a pula kutya Aangola mboka otaya piti peni okushuna koshilongo shawo, ngaashi ya lombwelwa omwedhi gwa yi, ngele omweelo gwaAngola ogwa pata.“Sigo onena oomweelo gwopoongamba dhaAngola odha pata, oshoka anuwa omwaalu gwaantu taya kwatwa komukithi gwocorona ogu uka pombanda kehe esiku,” Endjala ta ti ngaaka.

Endjala okwa ti, omwaalu gwaAngola otagu ende gu uka pombanda naantu ye vule 2000 ya gongala pEtunda, omanga yamwe taya kongo uuhupilo moshitopolwa ashihe shaMusati.

“Onkalo otayi ende yu uka kuuwinayi,oshoka aantu otaya ningi oyendji nonando ka pena lela ekandulepo lyuupyakadhi weya taalela lyuukilila,” ta ti ngaaka.

Ta ti, otashi enditha omwenyo gwomuntu oshoka omwaalu ogundji gwaAngola ya gongala pEtunda, uunona uushona.

Ngoloneya okwa ti, aantu otaya ningi oyendji oshoka otaya nanwa komayambidhidho oshowo omakwatho Namibia ta gandja.

Aangola mboka ohaya iyakele moNamibia okupitila momiyelo kaadhi li paveta, noyendji ohaya piti ethimbo lyuusiku,” ta popi ngaaka.

Ta ti inashi kala oshipu okuyambidhidha aantu mboka, ihe oshigwana shaNamibia osha kambadhala okuyambidhidha naashoka shi na po okuhupitha aantu mboka.

Ngoloneya okwa kumagidha oshigwana natango shi tsikile okuyambidhidha nashooka shi na po, okuhupitha aantu mboka ye ya okukonga uuhupilo moshilongo shetu. Sayiya Andonyo gumwe gwoomaAngola okwa ti, shoka she ya eta moNambia okukonga uuhupilo, ihe kaye na esiku ya shune koshilongo shawo ngele kape na omakwatho gasha okuza kepangelo lyawo.

“MoNamibia omu na omakwatho omahwepo, shi vulithe koshilongo shetu. Epangelo lyetu otali li tu ithana tu shune, ihe kali na ko nasha natse nando,” ta ti ngaaka.

Ta gwedha po ta ti ngeno okwa li ina ye ya okukonga uuhupilo moNamibia ngeno oyendji oya sa nale kondjala.

“Sho u wete aantu mboka kwali twa thiga komagumbo ye ya huka tu li, oshoka natango oya taalela uupyakadhi wa faathana. Ngeno okwa li ya kwathelwa ngeno inaya za ko,” ta popi ngaaka.

Andonyo okwa ti, nonando onkalo ye li muyo hayo ya hala, oyi vule ndjoka yi li koshilongo shawo.