Kakukutu komatanga Inspector General Sebastian Ndeitunga ota ti Ovanamibia inava pumbwa okukala tava hopaenene oilonga youshada ei tai longwa koshishiindalongo South Africa omo ta mu hokololwa ovanhu tava ponokele eenhele domangeshefelo nokunyeka po oinima yovanhu.

Oshivike sha dja ko ehangano lOryx Properties Limited ola pififa omukanda kutya ola longekida ovakeleli vomaliko oshoyo opolifi yaNamibia opo ikale ili oupafi oku amena omandiki omangeshefelo akula omo Windhoek.

Okwa didilikwa kwa kala onghundana tai dana onghandangala komalungula kutya eenhele dakula doipindi nando otadi ningilwa oilonga youshada ngaashi naana eshi tashi longwa koSouth Africa.

Meenghundafana a ninga naKundana Ndeitunga okwa hokolola ta ti Ovanamibia otava ka katukilwa onghatu yomeendelelo ngeenge ova kendabala oku longifa eenghono doku ponokela omadiki omangeshefelo. Ndeitunga okwa denga omufindo ta ti oshiwana inashi hetekela nande oku nyona po ombili yoshilongo, onghee okwa kunghulila nashi xulife po omadilaadilo okulonga ominyonena ngaashi okunyeka po oinima yomeefitola.

“Opolifi oye lilongekida opo ikale ya kwata po omunhu keshe ou ta ka longa oushadanoku ile ta kendambala okuvakula oilandifomwa yomeefitola. Oshikondo shetu she ameno oshi na oikwafifo yawana opo ku katukilwe onghatu omunhu keshe ta ka nyeka po oinima yomeefitola. Onghee oshiwana natu kale tuli oupafi efimbo keshe, nokukala hatu lopotele ovanambelewa vopolifi ile etanga leameno efimbo keshe,” Ndeitunga ta ti. Ndeitunga okwa ti mopaife ngaha eefitola dihapu oda longelwa oushada koSouth Africa, omo novanhu vahapu vaka nifa oilonga paife shaashi eefitola odaxwikwa po kovanhu.

Onghee okwa ti eshi itashi ningwa mo moNamibia, okwa denga omufindo ta ti ovapolifi novakwaita vetanga leameno okwa pewa nale omadeulo a wana opo va kale vakwashipaleka kutya keshe omunhu ta ka longela eefitola oushada okwa kwatwa po, yee otaka ungaungwa naye pa veta yoshilongo.

Okwa ti ku keshe ou taka uda ovanhu tava popi kombinga va hala okuponokela eefitola nakwatafane nopolifi opo omunhu oo a kale a katukilwa onghatu yomeendelelo.

“Namibia oshilongo shina ombili nelandulafano onghee hano inatu pumbwa okukala hatu longa oushada ngaashi naana ou uli ta u longwa koSouth Africa shaashi osha nyika oshiponga neenghono,” Ndeitunga ta ti.