Aafaalelwa taya zi komafudho kiitopolwa yokonooli taya shuna kuushimba, oya lulilwa sho aahingi yuumbetsa taya hogolola tango aantu mboka ya ilongekidha okufuta oshimaliwa shi li pombanda. 

Amushangandjayi mehangano tali ithanwa Namibia Bus and Taxi Association Pendapala Nakathingo okwa kunkuwilile aahingi yoombesa opo ya futithe aafalelwa oshimaliwa shoka sha uthwa kepangelo lyaNamibia okufutwa. 

Okuza mOshakati okuya koWindhoek ohapu futwa ashike N$330 omanga okuya kOmbaye ohapu futwa N$ 380, ashike aafaalelwa mboka ya lulilwa ya hala oolefa yamwe otaya lombwele aahingi yuumbesa kutya otaya futu ooN$500 sigo oN$600. 

Nakathingo okwa ti, mboka ye na iimaliwa ya pitilila oyo taya eta evundakano oshoka otaya futu aahingi iimaliwa ya gwedha po kombanda yofuto yolefa, opo ya mone omahala, omanga mboka ye na ashike oshimaliwa shoka hashi futwa shito taya thigwa po. 

Ta ti, ehangano lyawo olyu uvite ko kutya ndika olyo ethimbo lyoku ninga oshimaliwa, ihe naya nengeneke ngaa oondando. 

“Haantu ayehe ye na iimaliwa, yamwe uunona tawu shuna koosikola onkene itau vulu okufuta oshimaliwa sha gwedhwa po,” ta fatulula ngaaka. Nakathingo kwa pandula aahingi yoondjila oonde opo ya hinge nuukeka nokulandula omandhindhiliko goomondjila ethimbo lyomatango omanene onkene ota indile natango ya tsikile nombepo ndyoka. Kundana sho kwali ayi pOkatana service mOshakati mpoka tapa londele aantu taya shuna kuushumba, uusiku wOlyomakaya, okwali aadha aantu ya lala metala moka ya ningila okumona okambesa hoka taka thiki po tango okuza kuushimba. 

“Nonando twa lala mpaka, ompito yoku kala inaatu mona ombesa opo yili oshoka oombesa sho ta dhiya ohandhi hogololo ashike aapambele yawo nenge mboka yeshi nawa. Omunelago to mono, ihe ongele wa popi oshimaliwa sha kola,” Maria Shikongo ta kongo oolefa okuya koWindhoek ta nyenyeta ngaaka. 

Omufaalelwa gumwe okwa popi ta ti, oshigwana otashi nyenyeta kutya oshike inaaya shuna kuyele, ihe haayehe haya longele epangelo, ilonga yimwe oya pata konima yo kili oshowo yomumvo omupe. 

“Tse yamwe otwa mono ashike omasiku gatano konima yomumvo omupe no tuna okushuna kiilonga ethimbo ndika, ota tu ningi ngiini,” ta ti ngaaka. Ta ti, oyena uumbanda okukatidhwa kiilonga oshoka omasiku otaga pitilile. Omushingi gokambesa omukulu Amini Samuel okwa ti, oshigwana nashi kale shina ontseyo kutya ohaya hingi iipundi okuza kuushimba oshoka kakuna aantu. 

“Otuna okugwedhako oshimaliwa kaafalelwa opo tu vule okufutila po iipundi mbyoka yeya kaayina aantu oshowo omahooli,” ta popi ngaaka. Ta fatulula kutya ihaya pula aantu ya fute oshimaliwa sha pitilila, ihe aantu oyo haya popi oondando dhawo oshoka oya tila okuthigala po. Ta ti, oondando inadhi pumbwa okunyenyetwa pethimbo ndika oshoka nayo oya taalela uupyakandhi, ihe itaya vulu okukana. 

vkaapanda@nepc.com.na