!GOMENǁGAMS - ǁKhaeheǁoasase ra ǂharo Covid-19 ǁōgu !gôagu ge !hūb !nâ ǁōhâ sorodi !khai!khai!nâ!khaiga ǀgaisa ǁgâib !naka ūhâ. Aitsama mâbasen ǂharugu!khaigu ge nē mâsiba oresa hōbas ase ge !â, ǁîn sîsenūxūn tsî !ân, aiǁgause !khai!khai!nâ!nari-ūxūn khami. 

ǀNîkhami kō !gôab di ǂurusib direktern, !hūb a ǂhabase hân hîab New Eraba ǂoa ge wekheb !nâ gere ǁgamǁare-ūn ge gere mî, ǀnî !khain ǁîn ge aiǂhomin, !nonasa xu 16 sorodi kōse ǀgui ǀgui ǁaeb ai a tani ǁkhāsa. ǀNî ǀkharigu ge nausa ge !gâi!gâ i, aitsama mâbasen ǂharugu-aon xa ge !khai!khai!nâ !khaigu ǀkha ǁaeroba nî sorode !khai!khai!nâs !aroma sîsenūse a !nâ!khoebahena. 

“Sida ge ǀgūǁae aitsama mâbasen ǁkhō!oabade ge ǂgan, in huiba mā da, kaise ǂgui !gôab sorodi ǂhanub !khai!khaiǂgaes tawa Omaheke ǀkharib !nâ ge hâ i amaga,” tib ge ǀkharisi direkteri Jeremia Shikuloba gere mî. 

Kavangob Huriǂoas ǂurusib direkters, Fransiska Hamutenyas ge New Eraba ge mîba, ǁîn mâsib tsîn nausa !khō!nom!nomsa tama hâsa. ‘Sida ge ǀkharisi !khai!khaiǂgaesa ūhâ, xawes ge kaise a ǂkhariro, 20 sorodi taniǁkhāsib ǀguibas ūhâse. 

Ai!âs ge Hamutenyasa ge mî, Nkurenkurus !khai!khaiǂgaes tsîn ǀoasa sîsenǁkhāsib !nâ ge hâ tama hâ isa tsîn ǀnî ǁae ǁōhâ sorosa ǁaupexa 60 kilometerga Nkurenkurusa xu ǁîs a ǀgū ǂurusib !khai!khaiǂgaes !oa ge !nari-ūse. 

Sida ge Covid-19 ǀasa ǂhīgudi tsî ǁōgu !gôagu ra ǀarosen khami mâsiba ǂōrisase ra kō!gâ tsî ǁnās !oagu ǀawena nî dī, mâti da nē mâsiba oresa nî hōbasa” tis ge ge mî.

Otjozondjupab ǂurusib direkteri Gebhardo Timotheusi, ge ge mî, ǁîn ǀgaisa ǁgâib !nâ ge hâ isa, xawen ge ǂharugu-aon tsî ǂhanub tsîna !khōǁôagu tsî mâsib !khai!khaiǂgaedi !nubusib diba oresa a hōbasa, nausas Otjiwarongosa noxopa ǀgaisa ǁgâiba ra hō!â xawe. 

Aitsama mâbasen ǂnûiǂgās ge Okakararas, Otavis tsî Osire !hūsaben Kampi !khai!khaiǂgaede ge !gâi!gâi. 

Erongo ǀkharisi mûǂamaob, Neville Andreb ge ge mî, !Gomenǁgams, !Ūsa!khōs tsî Tsoaxubams !khai!khaiǂgaedi taniǁkhāsib !nâ noxopa hâsa. 

Ohangwenas ǂurusib direkteri, John Hangob ge ge mî, ǁîb ra ǂan!gâsa, ǁgoaǂuin hâsa, nausan !nona !khai!khaiǂgaede ǁnā !nona ǀkharisi ǀaeǁgâugu tawa ūhâsa. 

ǁAupexan ge ǂoa ge wekheb Denstaxs kōse 83 khoena Ohangwenab !nâ Covid-19 xa ǁō hâ. 

ǂUrusib ministeris di direkteri, Ben Nangombeb ge ge mî, nē mâsib !khai!khaiǂgaediba hui!nâs ases ge ministerisa a!â gere ǂoa wekheb !nâ !nani kontainerdi hîa !khai!khaiǂgaedi ase sîsenūhe ǁkhādi, ǁaupexa N$1 miljuns ǁkhāsiba ūhâde Namports tsî Maersk hâra xu ǁerob ǀgaiba !khai!khai!nâ ǂgaedi ase sîsenūs !aroma a !khō!oasa.

Nangombeb ge aitsama mâbasen ǂharugu-aon hîa ge aiǁgause Tsaraxa-aibes, !Gomenǁgams tsî Kaiǁkhaes hâde ǁaerob ǀgaiba nî sîsense !khai!khai!nâ ǂgaedi ǀkha a hui!nâna. 

ǂOa ge wekheb kōsen ge 2 665 khoena Covid-19 xa ge ǀoǀuni tsî 114 400 Covid-19 ǁōsa ge hōse.