Mwene womukunda Omhedi B Vilho Shimwooshili pamwe novanediko laye ovau nganeka oshikonga shetunhilo kombuto yoCovid-19 pomukunda wavo, omo va waiminwa kohamba yOvakwanyama.

Oshikonga eshi oshali ko mEtitano lomafiku 13 Aguste.

Shimwooshili ta ti ohamba yOvakwanyama mekulu Martha Mwadinomho yaKristian Nelumbu naye okwa kala e kwetele oshikonga eshi komesho nokwa popifa oshiwana, yee ta yandje etumwalaka laye kombinga yefimano lotunhila. 

Meenghundafana a ninga naKundana Shimwooshili ovanamikunda ava va ka tunilwa ovomomikunda dili hamhano mwa kwatelwa Omhedi A, Omhedi B, Ouhongo, Etundalomutaku, Etale nOmutwewoshimbungu. Okwa ti osha fimana opo ovanhu va kale va ka tumhilwa opo veli amena kombuto ei, nokukwashipaleka kutya etandavelo lombuto otali shu na pedu.

Onghee hano oshiwana otashi indilwa opo shiye keenhele detunhilo momivalu dinene.

“Ketunhilo oku otaku ka kala yoo vali kuna ovanafikola ava va wanifa eedula dokukala va tunhilwa tava di keefikola dayooloka, omo twa teelela novahongifikola ava vena ehalo. Onghee elalakano otwa hala opo eefikola domomikunda detu nado di kale dina oshiwana sha amenwa kombuto, nokeelela omafyo ovanhu tava file momikunda kombuto ei,” Shimwooshili ta ti.