New Era Newspaper

New Era Epaper
Icon Collap
...
Home / Ohanona ya  li ya fumbikwa nomwenyo kuyina oyi li monkalo yi  li nawa

Ohanona ya  li ya fumbikwa nomwenyo kuyina oyi li monkalo yi  li nawa

2021-01-07  Victoria Kaapanda

Ohanona ya  li ya fumbikwa nomwenyo kuyina oyi li monkalo yi  li nawa

Ohanona ndjoka ya hupu oyi li monkalo tayi etitha omukumo moshipangelo shaNgela moshitopolwa shaHangwena, sho kwa li ya fumbikwa nomwenyo kuyina Olyomakaya ga zi ko.
Sha ikolela kepeko lyopolisi yina yohanona ngoka e li moshipangelo miikaha yopolisi, okwa li a imonitha okanona ye mwene mondunda ye yokulala momukunda Oupili.

Otaku hokololwa kutya omukiintu ngoka gwomimvo 20, okwa li a tonyene ohanona mekumbatha ee te ke yi fulila okalambo koosendimita 30 okuya mevi moka e yi fumbike.

Opolisi oya ti, shika oshe ya puuyelele konima gumwe gwomaakwanezimo a li a lopotele opolisi, konima a li a mono oombinzi  dha ndonda megumbo alihe nomainyengo gomukiintu ngoka taga limbililike. Ta yi ti, nonando a li a pulwaapulwa tango, okwa li a yamukula kutya etegelelo lye olya tika, shoka inaashi itaalwa oshoka okwa li lya thika poomwedhi dhokuvalwa.
Opolisi okwa li ya landula ondjila yombizi sho ya ndonda sigo oompoka a fumbike ohanona, e teyi fumbula mo ee tayi falwa koshipangelo meendelelo.

Oshipotha shonkambadhala yedhipago osha patulwa, nokwa tegelelwa a ka holoke mompangu muule womasiku omafupi.
Moshiningwanima inaashi faathana, omasipa gwomuntu ngoka ga li ga itsuwa kohambo yedhina Omako momukunda Iitapa ga dhimbululwa.
Omukuluntu gwopolisi moshitopolwa shaMusati Titus Shikongo okwa ti, omasipa ngoka oga Shikongo Wilbald Linekela ngoka anuwa a ningi ethimbo a kana.

Shikongo ta ti, Linekela ngoka anuwa a li e na uunkundi wopamadhiladhilo okwa li a kanene mo 2019 muDesemba.
Ta ti, aakwanezimo oya li ya koleke kutya omasipa ngoka oga Linekela, niizalomwa ayihe osho wo omakumbatha ga adhika po otaga ulike kutya oge.
Shikongo ta ti, omawuthemba agehe oga monika, nefumbiko lye olya tseyithwa ta li ka kala ko metiyali ta li ya, momasiku 12 gaJanuali.


2021-01-07  Victoria Kaapanda

Share on social media