Omupedu minista wouministeli woikwameni neameno lokeengamba Daniel Kashikola okwa ti ouministeli wavo otau lalakanene ya yandja omaufemba woshilongo kOmunamibia keshe.
Omupedu minista edi okwe di popya pefimbo a talela po oshitukulwa shaHangwena noshitukulwa shaKavango wokouninginino eshi kwa li ta popi novakwashiwana kombinga yoshikumungu shokuhe na omaufemba.
Okwa ti osha fimana omunhu keshe a kale e na omaufemba opo a dule oku mona omayakulo opashiwana. Kashikola okwa ti ope na ovanhu vamwe vehe na omaufemba unene tuu oshiwana shovayelele shi li moshitukulwa shaHangwena noshoyo koKavango shaashi kasha na ouyelele we lixwa po u li kombinga yomayakulo haa yandjwa keembelewa doikwameni.
Pefimbo letalepo laye Kashikola okwa ninga oshikonga momikunda shokuyandja omaufemba ngaashi eedjapo domadalo noumutwe kovakulunhu nounona.
“Otwa ti didilika ovanhu hava di komikunda vehe na omaufemba shaashi hava kala va taalela omashongo oshimaliwa sholefa shokuya keembelewa doikwameni. Onghee naashi osha eta opo tu kale twa tota po oshikonga shokuyandjela omaufemba momikunda opo ovakwashiwana va dule oku mona omaufemba,” Kashikola ta ti.
Okwa ti elalakano netalelepo okuyandja ouyelele moshiwana nghee ouministeli woikwameni neameno lokeengamba hau longo naashi tau lalakanene.
“Onda ninga onghendabala yokutalela po oshiwana opo shi topolelafane omashongo osha taalela momidingonoko davo kombinga yokuhe na oufemba nokukala va yandja omayelele avo nghee ve na okuyambididwa kouministeli wetu,” Kashikola ta ti.
Okwa denga omufindo ta ti Omunamibia keshe oku na oufemba wokukala a pewa omaufemba woshilongo onghee eshi oshi li oshilalakanenwa shotete tashi ka wanifwa po kouministeli wavo.
“Ouministeli woikwameni neameno lokeengamba ouli le po oku yandja omayakulo a yooloka koshiwana onghee naashi osha eta opo ndi uye moshiwana, ndi fatulule moule kombinga youministeli wetu,” ta ti.
Kashikola okwa weda po ta ti omunisteli wavo tau twikile noku ninga oikonga yokuyandja omaufemba komikunda da yooloka moitukulwa aishe moshilongo.
Festus Ingashipola weedula 23, e na ounona vatano okwa ti pandula omunisteli woikwameni eshi wa eta oshikonga shokuyandja omaufemba komukunda wavo shaashi paife okwa mona omhito dokushangifa ounona vaye aveshe eedjapo domadalo.
“ombelewa ili popepi name oi li kEenhana, oko handi ka kongela ounona vange eedjapo domadalo ashike okwa li nda sholola shaashi kandi na sha oshimaliwa sholefa,” Ingashipola ta ti. fhmalwa@nepc.com.na