“Okuyandja omasa kovanane vombazu ohepero tjinene komekurisiro wotjiwaṋa tja Namibia.” 

Indi eembo ehongonekwa romayamberero oyetja-127 wOvita vya Tjunda nomazemburukiro wonḓiro yOmuhatamunwa. Ovita vya Tjunda vya umba tji ya ri 6 ku Kambundu me-1896 nu kombunda yanao Hiakungairi otja kamburirwa pOmukuruvaro na kayaherwa   mOkahandja tji ya ri 12 ku Ngarano me-1896 pu na Nikodemus Kambahahiza Kavikunua. 

Embo ehongonekwa ndi mari hitasana noruuro rwovanane pekepeke katjisupi mOmaueuozonjanda pombongarero yourunga wovinamuinyo mbaave uru nokutja Oveta yOmauhonapare wOmbazu mai sokurundururwa kutja i yandje omasa kovanane vombazu momapanguriro woviposa womaurunga wovinamuinyo tjinga oyo nai ai ve remanisa moviposa mbi. 

Mu varwe ovaheṋendu pekepeke mbu mave undjirwa mOkahandja omayuva womasuviro nga Otjiuru tjEhi tjOkehi, Nangolo Mbumba novanane vozondjuwo zouvara nomauhonapare wozombazu pekepeke. Jazema Hangero wa hakaenene ku na Utumuna Tjozongoro, omutanda omupyuke movyombazu ngu ma ku kotjiwaṋa okuriyapura orondu omayuva nga omanene. 

“Me hungire ame roro omambo keraka kokutja mbi kahurure omeriyapuriro nga nawa. 

Ngatu ritjaere kovipurukise, omeva wamururu, omazenge momitima tjinene amatu penge okurikutjira mumwe novasuverasane.”

Erero ozondangere zomuhoko otji za tukire kOkahandja okukeriyapura tji za hungirire ku novakuru novaṱi kutja oviwaṋa novimbumba tji mavi utu okukumukira kOkahandja ndino, muhuka nganduu kOsondaha tjandje ozondjira za yapurwa wina ovaṱi novakuru ovipwite nomauvi ayehe va virura.