New Era Newspaper

New Era Epaper
Icon Collap
...
Home / Oimbuluma tai difa omaxwilili

Oimbuluma tai difa omaxwilili

2022-08-22  Festus Hamalwa

Oimbuluma tai difa omaxwilili

A dipawa kookalyamupombo, keedula 4 ka kwatwa onghonga 

Omulumemhu weedula 43 okwa fya omanga kaume kaye okwa lemana eshi vati va ponokelwa koolyamupombo pefimbo kwa li veli mondingosho tava nu molukanda Tutaleni Etitatu.

Nakufya okwa tongolwa oye Kornelius Jona omakalimo womolukanda Tutaleni.

Opolifi oya hokolola tai ti ovafekelwa ova ningila ovalumenhu omatilifo ve kwete eembele tava pula omaliko avo. Osho osha twala fiyo osheshi Jona a tuwe nombele noku fya.

Naku ku xupa oku li moshipangelo shaWalvis Bay ta mono epango lopaunamiti.

Opolifi oya ti okwa kwatwa ovafekelwa vatano mekwatafano lomafyo vavo opo va kale va ka pulwapulwa.

Ovakwapata vavo ova shivifilwa kombinga yomafyo avo nomakonakono opolifi otaa twikile.

Okwa lopotwa yoo okaana keedula nee oka kwatwa vati onghonga komulumenhu weedula 43 efimbo kwa li ke uya okudanauka nounona vaye.

Oshiningwanima eshi osha ningwa molukanda Tutaleni modoolopa yaWalvis Bay Etitatu.

Omupopiliko wopolifi moshitukulwa Erongo Inspector Ileni Shapumba okwa hokolola ta ti okaana okwa li ka etwa kovakulunhu vako ovo ve li ookaume nomufekelwa opo ke uye okudanauka nounona vomufekelwa.

Vati okudja opo omufekelwa okwa u fana nakuninga oshihakanwa monduda yaye ndele te mu longele oilonga yomunyonena eshi aye naye moixulo.

Okudja opo okaana oka lombwela ovakulunhu va ko nokonima ova lopotela opolifi fiyo omufekelwa ta kwatwa po.

Omufekelwa ota holoka momhangu Omaandaxa nota pangulilwa oshibofa shekwatonghonga.

Lwopoka opo, opwa lopotwa omukainhu weedula 36 naye a ponokelwa kovalumenhu vavali ndele tave mu kwata onghonga omanga a li e li mondjila tai koilonga. 

Ovafekelwa ovo ove mu nyeka yo oN$10 yaye kwali ei nunina olefa.

Oshiningwanima eshi nasho osha ningilwa modoolopa yaWalvis Bay molukanda Kuisebmond Etitatu.

Opolifi oya hokolola tai ti nakuninga oshihakwanwa okwa li tai koilonga efimbo lokeengulasha ashike manga e li mondjila okwa ponokelwa kovafekelwa.

Vati ovafekelwa ove mu ningila omatilifo ve kwete eembele tava ti kutya otave mu dipaa ngeenge ina hala okuyandja oshimaliwa.

Okudja opo ovafekelwa ova ya naye moixulo ndele tava faduka po.

Omakonakono opolifi otaa twikile moibofa yomakwatonghonga.

fhmalwa@nepc.com.na

 


2022-08-22  Festus Hamalwa

Share on social media