New Era Newspaper

New Era Epaper
Icon Collap
...
Home / Oipangelo mOhangwena kai wete apa tai nangeke ovanaudu  

Oipangelo mOhangwena kai wete apa tai nangeke ovanaudu  

2021-06-25  Festus Hamalwa

Oipangelo mOhangwena kai wete apa tai nangeke ovanaudu  

Omukulunhuwiliki wouhaku woshitukulwa shaHangwena Johannes Hango ota ti oipangelo yomoshitukulwa shaHangwena oya taalela eshongo linene neenghono, unene tuu pefimbo eli lombuto yoCovid19 tai dana onghandangala moshilonga.

Meenghundana a ninga naKundana Hango okwa hokolola ta ti oipangelo yomoshitukulwa shaye oina oudjuu weenhele ina di wana okutula ovanaudu a va veli kepango loCovid-19.

Hango okwa ti oshitukulwa shaye oshina omwaalu wovanhu vahapu nale, hava di komikunda tava ka konga ouhaku koipangelo ya kula ngaashi Eenhana, Engela nOkongo. Onghee paife ota ti oipangelo oiha di unene ovanhu tava vele omaudu ayooloka, omanga vamwe ova kwatelwa meembete.

Naasho oshili eshongo lakula moshitukulwa shaHangwena ngeenge otashi ya peenhele do kala ovanaudu moipangelo. “Efiku nefiku omwaalu ouli pombada wovanhu a va tave u ya koipangelo va kwatwa kombuto ei. Omo mwakwatelwa ovanhu ohava kala vena omadidiliko ombuto, omanga vamwe ohava kala veli monghalo idjuu,” Hango ta ti.

Hango okwa ti omafyo ovanhu tava fi kombuto okwa londa unene pombada moshitukulwa shaye, omo mwadidikwa ovanhu 38 va fya.

“Onghee oshiwana natuyeni tu katunhilweni opo tu kala tuli meameno. Ovanhu navadjale oulapi vokomilungu efimbo keshe, ovanhu ina vapumbwa okukala veli momangudumano pefimbo eli lidjuu lombuto tai dipaa ovanhu,” Hango ta ti. Okwa ti oshiwana nashi li ufe komilandu da tulwa po dombuto doCovid-19 efimbo keshe.


2021-06-25  Festus Hamalwa

Share on social media