Omukulunhuwiliki wouhaku moshitukulwa shaTjozondjupa Gebhardo Timotheus ota ti oipangelo neekila odihadi neenghono moshitukulwa shaTjozondjupa unene tuu pefimbo eli lidjuu lombuto yoCovid-19 tai dana onghandangala moshilongo.

Meenghundafana a ninga naKundana Timotheus okwa hokolola ta ti oshi li eshongo lakula la taalelwa koipangelo ili moshitukulwa shaye shaashi paife omwaalu otau ende wau ka pombada efiku nefiku wovanhu tava kwatwa kombuto.

Timotheus okwa ti ovanhu moipangelo itava wana mo vali shaashi kamu sha eenhele vali. Okwa popya yoo vali ta ti moipangelo kamu na sha omipepo da wana okukala da kwafela ovanhu vahapu ve li kepango loCovid-19.

“Omukifi ou owa kwata ovanhu vahapu moshitukuklwa shaTjozondjupa, keshe efiku ohatu yakula omwaalu uhapu wovanhu ve ya koshipangelo ve na omadidiliko ombuto ei. Onghee eshi oshi li eshongo lakula moshilongo ashishe,” Timotheus ta ti.

Okudja omudo wa dja ko okwa didilikwa ovanhu ve li 111 va fya kombuto yoCovid-19 moshitukulwa shaTjozondjupa paife.

Onghee okwa ti naashi osha eta opo eekila di kale dihadi unene omidimba dovanhu.

Okwa kunghulila ovakwapata voonakufya opo va kale tava ka tala ko omalutu oonakufya vavo pefimbo opo ku keelelwe eekila diha kale dihadi nayi, shaashi omukifi ou otau dipaa ovanhu neenghono.

“Oshiwana nashi ye shi katunhilwe opo shi shunife omhito pedu yokukwatwa kombuto, shaashi ngeenge omunhu okwa vendwa nena oha kala e na omhito i li pedu opo a kwatwe kombuto. Onghee osha fimana opo ovanhu va ka tunhilwe,” Timotheus ta ti.

Okwa ti fiyo opapa ovanhu ve li 9 000 ova tunhilwa kombuto yoCovid-19 moshitukulwa shaye.

“Ovanhu nava twikile okukala tave liufa komilandu doCovid-19 efimbo keshe,” Timotheus ta ti.