Omupopiliko wopolifi moshitukulwa shaShana Inspector Thomas Aiyambo okwa kunghilila oshiwana opo shi kale sha kotokela okatuwa katoka koToyota Corolla oko haka longifwa kookalyamupopmbo mokunyeka ovanhu omaliko avo meedoolopa unene mOshakati nomOngwediva.
MoCorolla omo vati ohamu kala mu na ookalyamupombo ovakainhu novalumenhu, va homata eembele nomakata tava ponokele ovanhu ile eengeshefa unene eenhele domanwino neesalona.
Aiyambo okwa ti paife opolifi mOshana oya lopotelwa oibofa itano yovanhu va nyekwa nokudengwa kookalyamupumbo hava kala motuwa itoka yoCorolla.
Moshivike eshi omwa lopotwa oibofa itatu yovanhu va ponokelwa natango kovafekelwa hava kala motuwa itoka yoCorolla.
Omunyeka wopo-IUM
Etivali omukainhu noukadona vavali ova ponokelwa kovalumenhu ve kwete eembele nomakatana tava pulwa va yandje eengodi davo dopeke noshoyo oshimaliwa.
Oshingwanimwa eshi osha ningilwa mOngwediva poshipupudilo sha-IUM efimbo loufiku. Opolifi oya hokolola tai ti omukainhu umwe okwa dengwa nekatana komutwe nokonima oukadona ove uya okuamena mukwao. Vati oukadona ova nukila omufekelwa tava kelele mukwao opo aha nyekwe ongodi yaye.
Omufekelwa umwe okwa kufa mo ombele yokapi ngeno a twe oukadona ashike manga tava kondjo noukadona, okwe litwa yemwene nombele medimo papuko.
Okudja opo oshiwana osha dengela opolifi ashike ovafekelwa vamwe ova faduka po diva notuwa yavo nonande inave shi pondola okunyeka ko omaliko ovanhu.
Nakuninga oshihakanwa nomufekelwa ova twalwa koshipangelo shaShakati opo va ka mone epango lopaunamiti shaashi aveshe ova mona oshiponga.
Omunyeka wopombaanga
Natango mEtivali, omukainhu weedula 56 kwa li ta di mombaanga yoBank Windhoek mOshakati a humbata oshimaliwa N$30 000 okwa nukilwa kookalyamupombo va dja motuwa itoka yoCorolla.
Vati omukainhu okwa hangika ta tauluka opate ashike mboli ookalyamupombo ova kala teve mu lifa eshi tadi mombaanga.
Opolifi oya ti eshi va nukila omukainhu okwa ingida mokule opo oshiwana shi uye shi mu yambidide nokonima omukeleli womaliko noshoyo ovakwashiwana va hangika ponhele opo ova endelela oku mu yambidida.
Onghee ovafekelwa inave shi pondola okunyeka ko oshimaliwa vali, ova faduka po diva va uka motuwa yavo.
Etitatu molukanda Kandjengedi omulumenhu kwa li ta ende okwa nukilwa kookalyamupombo va dja motuwa itoka yoCorolla ndele tave mu nyeke oinima yaye oyo a hangika kwa li a landa.
Momwedi Anguste, ondingosho yoEmirates mOngwediva okwa li ya ponokelwa koolyamupombo vatano va dja motuwa itoka yoCorolla ndele tava denge omunailonga, omukeleli womaliko noshoyo omulandi a hangika mondingosho.
Ovafekelwa ova kufa mo omwaalu woshimaliwa inashi shivika ndele tava fiye va teyaula po omashima oimaliwa e li mondingosho. Momwedi Juli, omuhongifikola womukainhu weedula 43 okwa ponokelwa kookalyamupombo vatatu pefimbo kwa li ta di kombaanga a ka nana oshimaliwa.
Oshimaliwa a nyekwa oshi fike poN$4 500, ouboba vombaanga noshoyo ongodi yaye yopeke. Oshiningwanima eshi osha ningilwe mOngwediva pofikola Liberty Heritage Private School moshanga shomutenya.
Opolifi oya hokolola tai ti nakuninga oshihakanwa okwa li a ka nana oshimaliwa pombaanga yo-FNB pOshana Mall.
Vati mboli manga ta di kombaanga ovafekelwa ova kala tave mu lifa kutya okwa uka peni. Opolifi oya hokolola tai ti eshi nakuninga oshihakanwa a londa motuwa yaye okwa uka keumbo mOngwediva novafekelwa ove mu landula fiyo okeumbo laye.
Eshi a fika peumbo laye okwa twala oinima meumbo oyo kwa li a landa okudja opo okwa fiya po otuwa yaye ndele ta ende keemhadi fiyo opofikola opo ha longele.
Opolifi oya ti eshi ta ende ovafekelwa ova landula natango omukainhu oo tava shingi otuwa itoka yoCorolla yonomola yEenhana ashike omukainhu okwa kala a limbililwa kotuwa ye mu landula okudja kombaanga.
Vati eshi omukainhu ta hale okufika poshivelo shofikola okwa nhukilwa kookalyamupombo ve kwete eembele ndele tave mu denge nokumuningila omatilifo kutya otave mu dipaa ngeenge ina hala okuyandja oshimaliwa.
Opolifi oya ti omakonakono opolifi otaa twikile moibofa aishe youmbudi