Okangendjo kuusiku hoka ka kala okuza 22h00 sigo 04h00 oka gwedhelwa nowili yimwe okuza 23h00 sigo 04h00. 

Ndhoka odha popiwa komuPresidente gwoshilongo Hage Geingob sho kwa li ta tseyithile oshigwana omalandulathano oshowo omilandu okukondolola omukithi gwoCovid-19. Ta ti, omalandulathano ngoka otaga kala metifa okuza nena sigo omasiku 15 gaKotomba nuumvo.

“Otwa gwedha ko owili yimwe kokangendjo kuusiku, opo tu gandje ompito kwaamboka haya longo sigo 22h00, okupakela oshowo okukathika komagumbo muule wowili ndjoka ya gwedhwa ko,” ta fatulula ngaaka.

Ta popi ta ti, konima yowili 23h00 kape na nando ogumwe apitikwa oku enda, ethimbo ndyoka kehe gumwe na kale a thika megumbo. Ta ti omahala gomanino otaga tsikile ngaashi ga li ga tokolwa momasiku 06 gaSeptemba. 

“Mboka ye na omikanda dhokushingitha, sha ikwatelela komukanda otaya shingitha okuza Omaandaha sigo Olyomakaya okuza 09h00 sigo 22h00. Mboka kaaye na omikanda otaya landitha Omaandaha sigo Etitano 09h00-22h00,  omanga Olyomakaya okuza po09h00 sigo 13h00 yomutenya,” ta fatulua ngaaka. Omupresidente okwa yelitha wo kutya omahala gwomayimweneneno oga uthwa okulanditha omalovu opamwe niikulya esiku kehe. “Otandi yelitha kutya omahala gomaninwo inaga uthwa okulanditha iikolitha mOsoondaha,” ta fatulula ngaaka.

Ta gwedha po ta ti, omangundumano oga gwedhelwa sigo aantu 150, oshowo omangundumano pomahala gomawudhano nago oga gwedhelwa, oomwalu sigo 150.

“Kehe ngoka a sa komukithi gwoCovid-19, efumbiko nali ningwe muule womasiku 10, nomalongekidho gwokulya naga ningwe pamukalo gwokutumba noku ka lila komagumbo gawo,” ta popi ngaaka. Geingob okwa kumagidha wo oshigwana shi ka tuntilwe, nonando okutuntilwa otaku zi kehalo lyomuntu yemwene, ihe itaku thiminikilwa omuntu.

“Oshike omuntu e na okuthiminikwa, omanga e shi shoka shi li mondjila, kehe gumwe oku na uuthemba okuhogolola etokolo lye lyomondjila,” ta kumagidha ngaaka.