New Era Newspaper

New Era Epaper
Icon Collap
...
Home / Okanona komimvo ne ka si omeya

Okanona komimvo ne ka si omeya

2022-06-28  Victoria Kaapanda

Okanona komimvo ne ka si omeya

Konima yolukongo oluleeleka lwokanona komimvo ne, Amon Pombili Kasper, oonyolo dhoongaku dhe odha li dha gandja efano kutya okwa sa omeya mokanala.

Omupevikuluntu gwopolisi moshitopolwa shaMusati Moses Simaho okwa ti oshiningwanima shoka okwa li sha holoka Olyomakaya momukunda Oshipanda momudhingoloko Oshikuku, moshitopolwa shaMusati.

Otaku hokololwa kutya olutu lwaKasper okwa li lwa monika sho kwa li kwa ndhindhilikwa okahauto a li ta dhana  oshowo oongaku dhe, dha li kombanda yomeya mokanala hoka ke li popepi negumbo.

Ta ti, Kasper okwa li anuwa a thigwa megumbo komukuluntu ngoka kwa li e li nayo megumbo nayakwawo yane megumbo aakuluntu kuye, ye li pokati komimvo 16 oshowo 17.

Omukaleli omukuluntu anuwa okwa li a yi a ka longa koshikunino, e ya thiga mo ayehe megumbo.

Ta hokolola kutya yakwawo mboka okwa li ya zi mo megumbo, ya ka dhana etanga, anuwa,  ihe kakwa li ye na ontseyo  ngele Kasper omo e li megumbo, nayo okwa li ye shi okwa li a yi nomukuluntu ngoka a li nayo megumbo.

Anuwa aanona mboka sho kwa li ya galuka kuudhano, kakwa li ya adha mo omuntu megumbo, okwa li ya dhengele omulumentu ngoka taya pula ngele oku li naKasper, ihe kakwa li ye li naye.

Otaku hokololwa kutya okwa li kwa tamekwa okukongwa sigo ya landula oonyolo dhoongaku ndhoka kwa li dha hulile pooha dhomeya gokanala.

Olutu okwa li lwa hadhwa mo momeya okuza komatango golyOmakaya sigo Osoondaha.

Simaho okwa ti, olutu okwa li lwa pondolwa okumonika sho kwa li lwa yogwa mo kaayogi ya pyokoka okuza kopolisi moshitopolwa shaShana, nolutu okwa li lwa monika Osoondaha moshanga shomutenya.

Opolisi moshitopolwa shaMusati oya ti, oonkundana dhaanona taya si omeya, kadhi shi oompe, onkene opolisi oya kambadhala aluhe okukumagidha aakuluntu ya kale aluhe taya sile oshimpwiyu  aanona ye li kohi yomimvo.

“Eso lyomeya ihali holoka ashike kaanona, ihe nokaakuluntu moshitopolwa shetu, onkene otwa kala nokukumagidha oshowo okugandja omalongo ihe onkalo itayi lunduluka,’’ ta yi ti ngaaka.

Ya gwedha po kutya, aakuluntu naya kale aluhe ye li metonatelo lyaanona, naya kale aluhe ye li mekwatathano uuna taya zi mo momagumbo na kehe ngoka e li po opo a sile aanona oshimpwiyu.

vkaapanda@nepc.com.na   


2022-06-28  Victoria Kaapanda

Share on social media