Osikola Iilyateko Combined School yi li mOshikandjolongo shaNesi, moshitopolwa shaMusati, oya yambidhidhwa kehangano Old Mutual noshimaliwa N$10 000 okuopalekulula olugumbo lwosikola.
Osikola ndjoka oyi na aalongwa 654 ye li moondondo okuza po-0 sigo ondondo 11, noya kala nolugumbo itaalu hokitha, nokwa li ya yambidhidhwa noshimaliwa shoka, mehuliloshiwike.
Omukuluntusikola Shemunyenge Hamukwaya okwa hokolola kutya osikola okwa li ya ningi omaindilo maakwashigwana, mwa kwatelwa aalongi, aavali, naalongwa yoposikola mpoka nosho wo aanangeshefa moshitopolwa, opo ya yambidhidhe shi na sha nokuopaleka olugumbo lwosikola.
“Oshimaliwa shoka kwa li twa yambidhidhwa nasho kehangano ndyoka kwa li lyu uvu omakemo getu, Old Mutualo osha landa iilongitho ngaashi oondhalate dhooshipe noshowo oopaala dholugumbo.
Hamukwaya okwa pandula ayehe mboka ya kwathela osikola sigo oompaka, moka mwa kwatelwa kehe ngoka a li a yambidhidha nokashona e na po, opo osikola yawo yi opalekwa.
Mathew Nambandi, ngoka oye e li omukuluntu gwombelwa yoOld Mutual mOutapi, oye a li a kalele po ehangano lyoOld Mutual.
Nambandi okwa li a fatulula omalalakano gehangano lyawo, moka mwa katelwa omakwashipaleko nosho wo okuyambidhidha oshigwana poompito dha yooloka.
“Ota tu indile aalongisikola naakwashigwana ya ninge omapungulo gawo mOld Mutual, opo ehangano ndika li vule okukwathela mpoka pe na ompumbwe moshigwana uuna li na oonzo dheyambidhidho,” ta indile ngaaka.
Tate Werner Mengela, gumwe gomiilyo yetonatelonongelonongelo posikola ngoka a ningi omapandulo pehala lyosikola, okwa li a holola olupandu olunene sho Old Mutual a yamukula keindilo lyosikola.
Okwa indile natango Old Mutual a kale noku yambidhidha unene oosikola ndhoka dhi li momashongo ogendji pethimbo lyongashingeyi unene nge tashi ya kiikwathithitholongo inayi gwanena.
“Osikola Iilyateko CS natango otayi pumbwa eyambidhidho opo yi mane okwoopaleka olugumbo lwosikola, oshoka oshimaliwa shoka ya kwathelwa nasho itashi ka gwana, oshoka natango okuna iilonga oyindji opo oprojeka ndjika yolugumbo yi pwe,” ta fatulula ngaaka.
vkaapanda@nepc.com.na