Olutu lwomukulupe gwomimvo 82, olwa adhika lwa endjelela momuti gwomukwaava, nongodhi yoplastika mothingo, Omaandaha.
Omugandji gwomauyelele gwopolisi moshitopolwa shaShana Frieda Shikole okwa ti oshingwanima shoka osha holoka lwopotundi 14h00 yomutenya, momukunda Amusa, momundhingoloko Eheke.
Otaku hokololwa kutya omukulupe ngoka okwa adhika megumbo lye, ihe inapu adhika ombapila ya shangwa sha.
Moshiningwanima inaashi faathana, aatamanekwa yane taya temenekelwa edhipago lyaantu yaali oya tindulwa eifutilemo, sho ya holokele mompangulilo yamengastrata yaTsumeb Omaandaha.
Oshipotha shawo osha undulilwa komasiku 10 gaNovomba nuumvo.
Sha ikolela kepeko lyopolisi yiiningwanima yomehuliloshiwike, omulumentu gumwe gwedhina Mathias Mandume, 41, okwa li a dhipaga mumwayinamati nomushiinda she.
Ta li ti, oshiningwanima osha holoka oshiwike sha zi ko momukunda Onandashiye momundhingoloko gwaBravo moshitopolwa shaShikoto. Otaku hokololwa kutya Mandume okwa li a longo iilonga mbyoka yi nyanyaleka opamwe nomunamimvo 25 Johannes Immanuel, ngoka anuwa a li a yahwa pethimbo ya li ya mangwa oshoka okwali a hala okufadhuka po. Opolisi oya ti omulumentu ngoka oku li monkalo yi li hwepo. Shoka sha etitha edhipago lyaantu mboka yaali inashi tseyika natango.
Ta yi ti, olutu lwaGabriel Mandume, lwa tsuwa noombele okwa li okwali lwa adhika miihwa omanga lwaJose Domingos Ndengue lwa adhika okanano okashona okuza mpoka pwa adhika gwaMandume.
Otaku fekelwa kutya Ndengue oku na okukala a mono oshiningwanima shotango sho sha holoka.
Aatamanekwa mboka yaali okwa li ya ponokele oonakusa mboka noombele oshowo nondjembo, noya li ya hulitha ethimbo olyo tuu ndyoka. Sha landula omakonaakono ga li ga ningwa kopolisi, ondjembo ndjoka ya li ya longithwa okudhipaga aantu mboka, okwa li ya adhika miikaha yaalumentu yaali Isak Petrus 38 oshowo Lotto Uupindi 69.
Moshiningwanima inaashi faathana omunamivo 36 Magrietha Williams okwa li a si sho a tsuwa nombele kukuume ke komiihole. Otaku hokololwa kutya omukiintu ngoka, kakwa li a tsuwa owina, oshoka okwa li ta hangukununa olugodhi lwa li pokati komuholike gwe na nomulumentu gumwe.
Sha ikolela kopolisi oshiningwanima osha holoka Olyomakaya molukanda Ongulumbashe moWindhoek.
Omulumentu ngoka okwa mangwa po.
– vkaapanda@nepc.com.na