Uuministeli wiikwamina noonkondo ongula yOmaandaha owa ti omwedhi nguka gwaNovemba oondando dhomahooli godisela otadhi gwedhelwa omanga opetolola itayi lunduluka. Ngaashi sha kala onkalo ndjiigilile okuza petameko lyomumvo nguka, omahooli oga kala taga lunduluka unene gu uka pombanda kehe omwedhi, sha ikolela komayalulo.
Iikando oyindji oondando odha kala tadhi londo, ihe omwedhi gwa zi ko odha kala ngaashi dha li. Omwedhi nguka odisela oya londo notayi kala tayi kotha N$24.10 molitela omanga opetolola tayi kotha N$20.08 molitela. Shika osha li sha uvitha nayi aahingi yoohauto dhodisela, sho ya kala taya nyenyeta okupitila komalungula oshowo miikundaneki ya yooloka.
“Oshike tu na okumona iihuna komahooli. Oshike epangelo lya nyengwa okukandula po uupyakadhi mboka tau thimininike oshigwana,” taya pula ngaaka. Taya ti komasiku gokomeho itaya ka hinga we oohauto oshoka kaye wete uupyakadhi mbuka tau ka hula. Omupopiliko nomugandji gomauyel ele muuministel i wiikwamina noonkondo Andreas Simon okwa ti omahooli ohaga lundululuka omwedhi kehe, shoka sha kala tashi ningwa omumvo aguhe nguka.
‘’Iiyeti mbyoka ya thiminike opo omahooli ga shune pevi oyo etompelo, omahooli nago moNamibia ga shunithwe pevi, sha ikolelela komayalulo,” ta fatulula ngaaka.
Ta ti, kutya oondando dhomahooli odha kala tadhi londo molwaashoka oondando dhomahooli inaaga dhindwa nadho odha kala nokulonda koEurope, hoka kwa ikwatelela omatokolo gelundululuko lyomahooli. “Opo uupyakadhi mbuka wu kandulwe po, otashi ka pula iilongo yaAfrica okumanga uukumwe kumwe okudhinda nokukondolola eyetepo lyomahooli shoka tashi ka pula oobiliona ondhindji,’’ ta fatulula ngaaka.
Ta gwedha po kutya etokolo ndyoka kali shi epu noitali ningwa pethimbo limwe, ihe otali ka kwathela egwo pevi lyongushu yondando yomahooli.
Omwendhi gwa ziko omuprima Minista Saara Kuugongelwa Amadhila okwati Namibia okwatula miilonga ekandulepo lyuupyakandhi womahooli wa taalela oshilongo. “Otwa tegelela oshilongo shaAngola shi mane omahogololo opo iilongo mbika iyali yi kuutumbe noku kundathana nkene yina okuyambindhindhathana kombinga yomahooli,” ta fatulula ngaaka.
vkaapanda@nepc.com.na