Komufala woshikondo sheendolongo nevyulonghalo Commissioner General Raphael Hamunyela okwa ti ovanyasha va ninga omaindilo okutambulwa momadeulo nokukutwa moilonga koshikondo sheedolongo nomavyulonghalo nava kale tave liendifa po tete.
Okwa ti osha fimana ngeenge omunhu te liendifa po tete manga ina tamake nomakonakono ile nomadeulo shaashi eshi otashi mu kwafele okukala e shi pondola pefimbo ta ka ningilwa omakonakono.
Hamunyela okwa ti omilandu odo da tulwa po dokudeula nokuningila ovanyasha omakonakono itadi lunduluka nonande ovanyasha tava nyenyeta kutya omakonakono nomadeulo omadjuu.
Okwa yelifa ta ti omakonakono oo ohaa longifwa koikondo ya yooloka ngaashi opolifi noshoyo etanga leameno onghee ovanyasha nave litule mo ashike momadeulo nomakonakono avo ngeenge ova hala okukutwa moilonga shaashi oilonga otai ka pewa ashike omunhu ou a pita omadeulo nomakonakono.
Edi Hamunyela okwe di popya pefimbo a ninga eenghundafana naKundana eshi kwa li ta nyamukula komapulo e likwatelela komanyenyeto kutya ovakonaakonwa otava lotoka oshinano shile ashike ominute edi va pewa odishona.
Etitatu ovanyasha va ninga omaindilo okukakutwa moilonga koshikondo sheedolongo nomavyulonghalo ova tameka nomakonakono avo otete moshilongo ashishe.
Ovanyasha ve li komakonakono avo otete otava lotoka oshinano 2.4km, ovalumehu otava lotoka ominute heyali omanga ovakainhu otava lotoka ominute hetatu moule woshinano osho sha tulwa po.
Pefimbo Kundana a ya meenghundafana novanyasha ovo va kufa ombinga momadeulo otete kOndangwa ova hokolola tava ti kave udite ombili shaashi ova pewa ominute dishona dokulotoka ashike oshinano oshile.
Omunyasha umwe womukainhu a dja kOmuthiya okwa hokolola ta ti mopate omu tava ningile omakonakono omuyadi omalinyengo eetuwa pefimbo tava lotoka.
“Mopate omu na omamanya fyee noxo ohatu lotoka mokati komutenya.
Ovanhu nava kale tava lotoka efimbo longula nokomatango shaashi efimbo olo kaku na omutenya,” ta ti.
Omunyasha umwe womulumenhu a dja kOkongo okwa nyenyeta ta ti okwe uya efimbo longula lwopotundi 06h00 a ninge omakonakona ashike okwa ka tameka okulotoka potundi 16h00.
“Efimbo alishe olo onda uhala ashike ndi li momutenya nondjala nda teelela edina lange li ufanwe ndi ka lotoke,” ta ti.
Okwa lotoka ominute 17 ashike paife okwa teka omukumo ngeenge okwe shi endifa nawa ile pamwe ita ufanwa vali a alukile momakonakono.
Efiku lotete lomakonakono ovanyasha aveshe inave shi pondola okulotaka ominute odo da dulwa po onghee ovati ova teka omukumo wokukala va kutwa moilonga.
fhamalwa@nepc.com.na