New Era Newspaper

New Era Epaper
Icon Collap
...
Home / Omakwato koonkondo ga indjipala mOshana

Omakwato koonkondo ga indjipala mOshana

2021-10-20  Victoria Kaapanda

Omakwato koonkondo ga indjipala mOshana

Opolisi mOshana oya lopota omakwato koonkondo taga indjipala moshitopolwa.

Omugandji gwomauyelele gwopolisi moshitopowa shaShana Thomas Aiyambo okwa ti, mehuliloshiwike omwa lopotwa omakwato koonkondo ge li gatatu.

“Omakwato koonkondo otaga indjipala onkene oshigwana otashi kumagidhwa shi kale sha kotoka ethimbo alihe oshoka aantu itaya inekelwa we,” Aiyambo ta kumagindha ngaaka.

Ta kumagidha oshigwana ta ti, uuna sha ningilwa omiyonena nashi lopote kopolisi mendeelelo, oshoka oya ilongekidha okugandja omayakulo ethimbo kehe. Momakwato koonkondo ngoka, omwa lopotwa, omunamimvo 20, ngoka a kwatwa koonkondo uule womimvo ntano komutekuli gwe.

“Okwa lopotwa kutya omukiintu ngoka okwa ningi ethimbo ta kwatwa koonkondo, ihe okwa li a lopota oshiningwanima shoka ashike Olyomakaya ga zi ko,” ta hokolola ngaaka.

Aiyambo ta ti, omukiintu ngoka okwa kala nokutekulwa komulumentu ngoka sho aakuluntu ye ya hulu ko. Otaku hokololwa kutya nakufekelwa okwa kala anuwa ta ningile omukiintu ngoka omatilitho kutya ngele okwe shi lopota ote mu dhipaga, ihe naye ti idhipaga. Omulumentu ngoka ta fekelwa moshiningwanima shoka ina mangwa po natango kopolisi, ihe omakonaakono gwopolisi oge li metifa. Opolisi moshitopolwa shaShana oyi li molukongo lwomulumentu ngoka a kwata omunamimvo 46, koonkondo. “Omukiintu ngoka okwa li a landulwa okuza puukamba komufekelwa ta pula a ye naye kaandjawo,” ta hokolola.

Ta ti, omukiintu ngoka sho a li a yamukula kutya ke na shoka ta ka tala kaandjawo, okwa li e mu dhenge noshiti mombunda sigo a gwile pevi.

Omulumentu ngoka okwa li a hili mo ombele noku mu ulika, ta ti ngele okwa kugu ote mu tsu nombele, omanga te mu kwata koonkondo.

Oshiningwanima osha holoka momukunda Oshipumbu shOmugongo. Omulumentu a kwata omukiintu momukunda Okaandje mOngwediva, sho a li e mu adha mondunda yakuume ke komiihole, ina mangwa natango.


2021-10-20  Victoria Kaapanda

Share on social media