Konima sho uuministeli wuuhaku nonkalonawa wa pititha kutya otuntila otayi ende kashona unene miitopolwa yokonooli, omalelo gopamuthigulwakalo oga kumagidha oshigwana shi ka tuntuilwe. Omupopiliko gwelelo lyopamuthigululwakalo lyOukwanyanyama Elias Uaandja okwa ti, elelo lyawo otali yambindhindha epangelo okulwitha omukithi ngoka.
“Oshigwana nashi thikame nena opo shi ka tuntilwe. Otuntila otayi shonopaleke oompito dhokukwatwa komukithi ngoka gwa faalela nale oomwenyo odhindji dhAanamibia,” ta kumagidha ngaaka. Elenga enene lyomukunda Etilyasa oshowo omupopiliko gwelelo lyOngandjera Sackeus Shiimi Shangula okwa ti, epangelo olya kala nokudhana onkandangala, okulwitha omukithi ngoka, onkene elelo lyopamuthigulwakalo lyOngangera nalyo ota li yambindhindha pompito ndjika.
“Otatu kumagidha oshigwana ashihe shi thikame nena okukaleka po oomwenyo dhawo. Thikameni mu ka tuntilwe nena,” ta kumagidha oshigwana.
Shangula okwa ti oya kala nokutuma omatumwalaka taya kumagidha oshowo taya longo oshigwana uuwanawa gwotuntila, okupitila mooyene otatu yomikunda.
“Otwa kambadhala okuthikitha etumwalaka kukehe gumwe, ihe natango otatu tsikile okukumagidha oshigwana,” ta popi ngaaka.
Elenga enene lyOmbalantu Oswin Mukulu moonkundathana naNampa okwa ti, otuntila yoCovid-19 nayi talike ko ngaashi ootuntila adhihe.
“Okutuntilwa oko kwa kala nale, omanga oshilongo shika inaashi manguluka. Okwa kala haku keelele omikithi dha yooloka,” ta ti ngaaka.
Ta kumagidha oshigwana shi ka tuntilwe opo ku kalekwe po uundjolowele oshowo okukalekapo oomwenyo dhawo nodha yakwawo.
Omunashipundi gwelelo lyOmbandja Kaleb Hamwele okwa ti, omukithi goCovid-19 oguli mo kati koshigwana, naantu oyendji oya si omolwa omukithi ngoka. “Otuna okwii ithana onge aanelago oshoka otuna epangelo lyetu ndyoka tali tu kondjele, oku ikeelela komukithi ngoka,” ta popi ngaaka.
Ta gwedha po ta ti, omanga pe na ompito yi li ngaaka, oshigwana nashi yi longithe okukatuntilwa.
Okutuntilwa otaku kwathele okushonopaleka ompito yokukwatwa komukithi gwCOIVID-19.
– vkaapanda@nepc.com.na