Omalutu gaantu mboka ya si omeya sho okambautu ya li ya londo ka tenguka Olyomakaya ga zi ko momulonga tagu ithanwa Oanob popepi noRehoboth oga monika.

Sha ikolelela kepeko lyopolisi lyiininingwanima ya holoka mehuliloshiwike, omalutu gaantu mboka okwa li ga monika pokati kootundi 13h00 oshowo 16h00 Osoondaha.

Otaku hokololwa kutya okambautu hoka kopaumwene okwa li ka londeke aantu ye li omugoyi potundi 19h30.

Opolisi tango oya li ya lopota kutya okambautu hoka sho ka li ka ningine, aantu ashike ye li yahamano ya li ye shi pondola, sho kwa li ya yogo sigo ookooha dhomulonga.

Omalutu goonakusa okwa li ga ningi ethimbo kaage wetike, noga ka monika esiku lya landula, sho kwa li kwa ningwa olukogo lwa kwata miiti, kaayoginkulungu. 

Otaku hokololwa kutya aantu mboka okwa li ya yi mombauto nelalakano lyokwiinyanyudha. 

Kuuyelele wa gwedha po otaku hokololwa kutya okambauto hoka oka li ka pu omaholi sho ka tengeku omanga taka hingwa.

Uuyelele inawu pitithwa ngele mokambautu moka kamwa li aahupithi yoomwenyo, okukwathela mboka ya li inaaya vula okuyoga.

Aakwanezimo oya li ya gongala poshipangelo shaSt. Marry Osoondaha, taya tala omalutu gaapambele yawo.

Oshiningwanima inaashi faathana olutu lokanona komvula noomwedhi 11, olwaadhika momulonga gwaMaruru  moshitopolwa shErongo.

Sha ikolelela kopolisi olutu ndoka okwa li lwa monika konima okanona hoka ka li ka kongwa sho ka li ka kana Etine.

Otaku hokololwa kutya okanona oka li ka thigwa metenonatelo lyomupambele, omanga yina kwali a fala uunona wumwe ketuntilo koshipangelo shaMaruru, hoka a li anuwa a kala sigo esiku lya landula ko.

Opolisi oya ti yina anuwa okwa li a lopotelwa esiku lya landula ko Etitano kutya okanona kadhona ke ka wetike. 

Konima opolisi ya li ya kongo okanona hoka, olutu lwako okwa li lwa adhika momulonga moka, ihe sigo oompaka kape na uuyelele wothaathaa kutya okanona hoka oka li ka yi ko ngiini komulonga.

Omakonaakono gopolisi oge li metifa. 

Okanona oka li ka tseyika nedhina Mbatenga Mbepera.

vkaapanda@nepc.com.na