Elelo lyondoolopa lyOmuthiya olyi li metifa okulongekidha omauliko giipindi ngoka taga ka ningwa oshikando shotango moshitopolwa shaShikoto.
Omauliko giipindi kohi yedhina Othithiya Festival and Career Fair, oga tengenekwa taga ka kala ko momasiku 28 sigo 31 July nuumvo.
Omukuluntu gwelelo lyondoolopa Omuthiya Simon Nghuulondo okwa ti, nonando omukithi ngoka goCovid-19 natango omo gu li mokati ketu, otaga ka ningwa mesimaneko lyoompango nomalandulathano gwokukeelela omukithi
ngoka.
“Elalakano lyetu, okugalula eliko lyoshimaliwa, oshowo oku li xwaxwameka mondoolopa yetu pamukalo gokuninga omangeshefelo gomalundhi ga yooloka,” ta ti ngaaka.
Ta ti, omawuliko giipindi ngoka taga ka holoka lwotango, otaga kala ompito ombwaanawa kaanangeshefa oshowo komahangano ga yooloka, oku ulika uunongo niilonga oshowo okushingitha iilandandithomwa yawo.
Ta gwedhapo po kutya mbyoka otayi ka kala wo natango ompito ombwaanawa kaanyasha oshowo kaalongwa, oshoka oshindji otashi ka etwa popepi nayo.
“Iipindi mbyoka ohayi gongaleke aanangeshefa oshowo aantu yaza ko kule, taya ulikilathana uunongo niilonga yawo, mehala limwe,” ta popi ngaaka.
Ta ti, elalakano okugandja ompito kaanangeshefa oshowo ko mahangano guulike iishingithomwa yawo oshowo okugalula eliko mondoolopa yOmuthiya.
Omawuliko giipindi otaga ka ulika iilandithomwa ayihe okuza kiikulya, kiizalomwa na kehe shoka hashi vulu oku etwa po noonyala oshowo oku eta oombelewa hadhi gandja omayakulo ga pumba po
pepi.
Ta ti, omawuliko giipindi go numvo otaga ka kala ga yooloka komakwawo, ngoka ga holoka miitopolwa yilwe oshoka ngaka otagaka ningwa momukalo gumwe gongushu.
Elelo lyondoolopa olya ti, ota li ka patulula oshiindingili shoka pambelewa momasiku 29 gaJuli.
Omulandithi gwiikulya yoshiwambo Martha Shiyagaya halanditha pomatala gomOmuthiya okwa ti, oya etelwa ompito ombwaanawa popepi, nonando oya kala haye shi uvu ashike tashi popiwa koondolopa dhilwe.
‘’Ndika ethano ta li ulike kutya ondoolopa yetu otayi humu komeho, oshoka oshindji otashi ende tashi lundulula, nonando oshimaliwa mondoolopa otashi shongola,” ta popi ngaaka.