Ehangano lyoopate lyoRoad Authorities (RA) olya yelitha kutya otali ka longa oopate dhimwe ndhoka hadhi kala nuupyakadhi uunene pethimbo lyomvula moshitopolwa shaShana.

Omukuluntu gwehangano lyo-RA Conrad Lutombi okwa li a totha mo iikandjohogololo mbyoka yi na oopate dha pumbwa okulongwa mendeelelo omolwomaupyakadhi ya taalela.

“Oshitopolwa shaHangwena otwe shi mana nale, nongaashingeyi otwa ipyakidhila noshitopolwa shaHangwena hoka ngele twa mana tatu ka tameke nOshana,” ta popi ngaaka. Ndhoka okwa li e dhi popi komeho gaminista yiikwalonga niiyenditho John Mutorwa sho a li a talele po oshitopolwa shaShana okupulakena omaupyakandhi gaa taga imbi ehumo komeho, oshiwike shika.

Lutombi natango okwa li a fatulula kutya oya li ya tameke okulonga oopate koshitopolwa shaMusati oshowo Ohangwena oshoka oko ya ndhindhilike haku zi uupyakadhi unene woopate ethimbo lyomeya.

Omukuluntu goombelwa oonene dhoshitopolwa shaShana Teopolina Hamutumua okwa li a totha mo oopate ndhoka dha taalela omaupyakandhi unene  moshitopolwa. “Opate ngaashi DR 3607 oku za kOshakati-Ompundja oya pumbwa okugwedhelwa opate yoholondo okuza kOmpundja–Enguwantale–Ekango Lyambambala oshowo omwelo gwaNaluvanda,” ta ti ngaaka.

Oopate ngaashi DR 3605 ndyoka ya za kOndangwa-Kuuwa kOndonga okupitila kUukwiyuushona – Omukandu Combined sigo Uulunga waKolondo odha pumbwa odha pumbwa okugwendhelwa.

Natango okwali wo a totha mo opate okuza koAdolf okuya kOngha. Mutorwa okwati, ehumo komeho ohali holoka ashike mpoka pe na oopate. “Yamwe itaya tsu kumwe nangaye ihe, ehwata ota li tsu kumwe nangaye oshoka, opo ehume komeho lyi holoke opena okukala pena opate ndyoka yina okukwatakanitha ehala lyontumba,” ta fatulula ngaaka. Minista esiku ndyoka okwa li a katalithwa oopate miitopolwa yaShana mbyoka ya taalela omaupyakandhi.

“Ehumo komeho nali holoke pomahala agehe moshilongo ashihe, itashi kala sha opala uuna oshikandjohogololo shimwe tashi longelwa uuwanawa shi vule oshikwawo,” ta popi ngaaka. Ta ti, uuwanwa nau topolelwe shi thike pamwe. Kansela gwoshikandjohogololo shaMpundja Adolf Hitler Uunona okwa li wo a tothamo kutya oshitopolwa she osho shimwe hashi kala sha taalela omaupyakandhi ethimbo lyomvula.

“Aakalimo yomoshitopolwa yandje ihaya tyapula uuwanwa woondjila ethimbo lyomvula. Iilonga oshowo omayakulo ohaga ga kalekwa ethimbo ndyoka oshoka kapena oopate okuya thikitha pomahala mpoka,” ta ti ngaaka.

Uunona okwa li a pula opo opate ya wo yi mone omayambindhindho meendelelo.

– vkaapanda@nepc.com.na