Omusamane gwomukuluntu ngoka a kala monkalo kaayi shi kuyelekwa okwa ti onkalo otayi ende tayi hwepopala omolwomakwatho ngoka ta yambidhidhwa nago koshigwana.

Omunamimvo 65 Simon Paulus okwa kala moluhepo, nomonkalo yaa na ekwatho uule wethimbo sho a li a lemana komukithi gwopolio omimvo 51 dha piti. 

Oyendji okwa li ya gumwa komitima konkalo yomusamane ngoka, sho okavidio ka li ka pitithwa koshifokundaneki shika taka ulike nkene Paulus a kala ta hupu.

Paulus okwa li a kanitha oonkondo dhokulongitha iilyo yolutu lwe, sho a li e na oomvula 14.

Paulus ngoka ha ende ende owala ta galangata okwa ti, onkalo oya li ya tameke oku mu dhigupalela omimvo mbali dha piti, sho yina ngoka oye kwa li he mu yambidhidha a hulitha mo2021.  

Oshigwana okwali sha yambidhidha lela, no makwatho gotango oga lundulula onkalo ye.

Omushiinda she ngoka oye a kala ta yambindhindha Paulus, Anna Kanana okwa ti, sigo oompaka Paulus okwa yambidhidhwa noshimaliwa N$3 000 ashihe kumwe oshowo iinima yongushu ya pita N$20 000. Iimaliwa mbyoka anuwa oya tulwa komayalulilo ge gombaanga.

“Inima mbyoka tandi popi omwa kwatelwa omizalo, iikumbatha, iikutu, iikulya, omatalashe, epoto lyokandjugo, okatemba, ongodhi yopeke niikwawo oyindji. Ayihe mbyoka oya zi komuntu gumwe,” ta ti ngaaka.

Ta ti, oshimaliwa shoka a tuminwa okwa lombwelwa opo a ka lande iikulya oshowo shoka ta pumbwa unene. 

Ta gwedha po ta ti, oongodhi otadhi lili ethimbo alihe, aantu ya hala okuyambidhidha Paulus.

Monkundathana naPaulus, okwa ti, onkalo ye oya lundululuka okuza esiku oshifokundaneki shaNew Era kwali sheya puye. “Ongodhi yandje oya pitile omauvaneko ogendji, ihe gamwe oga thika nale,” ta popi ye tahukumuna omahodhi, mongondhi. Ta hokolola ta ti, okwa hala okupandula ayehe mboka omitima dhawo dhali dha nengenekwa konkalo ye, nokumuyambindhindha oshowo okumutula momagalikano.

Paulus ta popi ta ti, shoka a li a thanekwa pethimbo kwali ta kuthwa ehokololo koshifokundaneki shika, hasho we e li nena. “Onda yogwa nda yela, ondunda yandje oya opalekwa, iikulya otandi li nawa,” ta ti ngaaka. Ta ti, ota pandula notaka pandula natango mboka ye li mondjila okutsikila oku mu yambidhidha.

Oshifokundaneki shika osha kala nokuyakula oongodhi, omatumwalaka gopangodhi, nooemail okuza moshigwana oshowo kondje yiilongo, taya pula nkene ye na okukwathela nokulundulula onkalo yaPaulus.

Omayambindidho gomonakuziwa

Shika hasho oshikando shotango onkalo yaPaulus tayi nyanyangidhwa. Petameko lyomumvo gwa yi aantu oyendji oya li ya inyengithwa konkalo moka a li, noku gandja omakwatho, konima sho a thanekwa koshikundaneki sha-NBC.

Sho tashi kumitha osho shoka kutya oyindji yomiinima ayihe mbyoka kwa li a pewa, inayi thika mo momake ge. Kakele owala kiinima mbyoka anuwa a li a pewa komunangeshefa gumwe gwomOhangwena. Iinima mbyoka anuwa okwa li e yi thikithilwa kuNgoloneya Walde Ndevashiya.

Iimaliwa mbyoka ya li ya umbwa nelalakano oku mu landela okatemba, anuwa ine yi mona po nande othilinga, ko okatemba ine ka pewa.  

Iitungitho mbyoka ya li ya landwa, opo ya falwa ko kuye oshiwike sha zi ko konima sho oshifokundaneki shika sha ningi omapulapulo.  Kansela goshikandjohogololo shOngenga Mathew Shikongo okwa koleke kutya Paulus okwa li a pewa omakwatho koshigwana, a gongelelwa oshimaliwa.

“Okwa li kwa totwa ongundu yokomalungula koWhatsApp hoka kwa li ku na aantu ya yooloka. Kongundu, okwa li haku kundathanwa shoka sha gandjwa naashoka tashi landwa okuyambidhidha Paulus,” ta hokolola ngaaka.

Ta ti, okatemba hoka taka opalele onkalo ye kwali taka pula oshimaliwa oshindji, nongundu ndyoka oya li ya mwena po, okuza omumvo gwa yi.

Ta gwedha po ta ti, okwa li kwa landwa okatemba kopakathimbo omanga taku kongwa hoka taka opalele onkalo ye.

“Okuza moshimaliwa shoka a li a yambindhindhwa nasho okwa li twa landa mo iitungithi yokandjugo, mbyoka ngashiingeyi nde yi fala kegumbo lye, onde yi gandja miikaha ye,” ta ti ngaaka.

Ingapi ya li ya gongelwa? 

Kansela Shikongo okwa yelitha kutya oshimaliwa shoka sha kala po sho kwa landwa iitungithi yokandjugo okwa li ashike N$3 300.

Ta ti, ita vulu okugandja omwaalu gwoshimaliwa ashihe kutya ingapi kwa li ya gongelwa ayihe kumwe okuza petameko oshoka haye awike kwa li ha tambula iimaliwa mbyoka. 

vkaapanda@nepc.com.na