Eyuva nda kekwa otjEyuva rOmazemburukiro wOtjiṱiro Otjindjandja mari zemburukirwa mOtjomuise
Osondaha.

Kehi yembo ehongonekwa, “Ourizemburuka na eṋe mau kunu otjivepo tjokutja atu he rihahiza”.  Okuza ku ndino ndi ngaa kOsondaha, omayuva tji ye ri 28 komueze mbwi, ozondekurona  maze kara novitjitwa pekepeke. Mu mu na omakawondjero womomivanda Osondaha okuza po UN Plaza mOkatutura ngaa kotjihuro po Alte Feste. 

Ozondekurona zOtjiṱiro Otjindjandja maze munu kutja za undju orure okuza ko-2016 omuheṋendu Usutuaije Maamberua mOmbongarero yOtjiwaṋa tja hitisa ombepo yokutja tji ye ri 28 ku Kambundu, ri zemburukwe kotjiveta otjEyuva rOmazemburukiro wOtjiṱiro Otjindjandja  mehi arihe nu wina ri ririsiwe eyuva romasuviro. 

NOkomiti yOmbongarero yOtjiwaṋa yOvitjitwa vyOngunḓeveta nOveta aya kara notukosi mehi arihe okuwonga oumune wotjiwaṋa nu kai ya yarura orapota yayo kOmbongarero yOtjiwaṋa yokutja otjiwaṋa tja yauza omayuva tji ye ri 28 ku Kambundu. Oyo nge ri omayuva mo-1908 ohoromende oruveze ndo yohuurire yEhi rOvandoitji tji ya raa omapatero wotumbo atuhe twa Katjombonḓi maamu ṱizirwa Ovaherero nOvakwena mba kamburwa movita poo kombunda yovita mba wongwa momakuti mu va ri ava kaṱara nave ṱizirwa mu two. 

Posi ya ngamba eyuva ndi ra kuramisiwa i yohoromende kutja ra handwa i tjike kari nokutjiukwa. Mu nao ozondekurona otji za tye kutja okuza mba ngandu ohoromende tji maai kerizemburukira kotjiveta ovo mave rizemburuka momuano wavo. Opu za sembamisire omazemburukiro waro okuza mu ndindo ndi ngandu kOsondaha. Peno maraisiro woviṋenge vyombazu pekepeke tjimuna ozondjupa nomitjira. Wina mape kara outjina nomuhiva, omatangero, ovikurya vyombazu nOtjihungiriro tji matji pyasa omatjangwa wOvahindwa vaPeke vOmihoko Omikutasane.