New Era Newspaper

New Era Epaper
Icon Collap
...
Home / Omeya taga matuka miishana kage shi efundja – Hango

Omeya taga matuka miishana kage shi efundja – Hango

2021-01-13  Victoria Kaapanda

Omeya taga matuka miishana kage shi efundja – Hango

Aakalimo yomomalukanda haga ningi iihakanwa yefundja mOshakati oye na eyikwatopomitima kutya onkalo yawo masiku otayi tameke okunayipala sho omeya ga tameke okumatuka miishana. Omeya ngoka oga ethithwa komvula ndjoka ya loko omasiku ga piti miitopolwa yilwe yoshilongo, ya teyagula po omagumbo gaantu oshowo oopate dho ku enda iihauto. Tresia Newaka omukalimo gwomolukanda Oneshila ta ti, okwa kundana kutya efundja olyi li mondjila, ihe oya londodhwa ya ilongekidhe okutembuka. “Sho omvula ya teya po omagumbo noondjila miitopolwa yokushiimba, ngele otse mboka tu li momalukanda haga dhengwa kefundja shinyanyaleka shito, otatu ka hupa ngaa?” Newaka ta ti ngaaka.

Ta ti, otaya fekele kutya omvula nuumvo otayi ka loka lela, ihe ngele efundja otali ya shili, elelo lyondoolopa yaShakati na li longekidhe omalukalwa gawo uuna taya ka tembuka oshoka omeya ngele ga thiki ohaya kanithile mo iinima yawo oyindji.
Mayola gwondoolopa yaShakati ngoka e li omunongononi gwomeya paithano, ta longele mUuministeli wuunamapya nomeya Leonard Hango okwa ti, oshigwana inashi pumbwa okutila pethimbo ndika.

“Efundja inali ya natango, shoka shi li miishana omeya gwomvula ndjoka ya loko unene oku a koongamba dhaAngola naNamibia, ihe kasha shi efundja ndyoka hali tembudha aantu, oshigwana inashi tila,” Hango a popi ngaaka.
Ta ti, omeya oge li ashike mondjila yago, ihe itaga ka thika momalukanda ngoka haga kwatwa kefundja shito. Hango ta kumagidha oshigwana kaashi kale shi na uumbanda pethimbo ndika, oshoka efundja inali ya natango, ihe ngoka omeya gwomvula ashike. Omukwateli komeho melelo lyondoolopa gwopokathimbo Cornelius Kapolo okwa ti, elelo lyondoolopa olya ilongekidha.

“Elelo lyondoolopa olyi li metifa okulonga ondjila ndjoka hayi ende omeya, okuyi fula yu uka muule opo omeya ga ende ga manguluka,” Kapolo a popi ngaaka.
Ta fatulula ta ti, natango elambo ota li tulwa omavi kooha, opo ga keelele omeya kaaga pite ga ye momagumbo gomEhenye ngoka haga udha omeya gwomvula.

Cornelius ta ti, shoka tashi longwa mo ngaashingeyi okupa ompito omeya ga pita ga manguka mondjila ha go. 
Ta ti elambo ngele olya yi muule lyo enene mooha, omeya ohaga pi ti ga manguluka no hata endelele.


2021-01-13  Victoria Kaapanda

Share on social media