Opombela yoMalaria mOngwediva oya ta meke momasiku 04 ga Kotomba notayi ka hula pehulilo lyomwedhi nguka.

Okupombela otaku ka pombela ashike omikunda ndatu Odiva, Onheleyiwa oshowo Oikango 1 no 2.

Kansela gwoshikandjohogololo shaNgwediva Andreas Uutoni okwa ti, omikunda ndhoka dha tothwa mo, tadhi ka pombelwa ondhoka ashike mwa lopotwa iipotha yoMalaria.

Kansela okwa kumagidha oshigwana shi longele kumwe naanambelewa mboka taya ka thika pomagumbo gawo.

Ta ti, otaya ka kala ye na omandhindiliko ga yooloka ngoka taga ulike kutya oya za kelelo lyondoolopa yaNgwediva shili.

“Okupombelwa okwasimana, okukeelela omukithi gwoMalaria ngoka hagu ziilile unene moomwe no hagu faalele wo oomwenyo dhaantu.,” ta ti ngaaka.

Ta ti, okukeelela omaupyakandhi ngoka ga holeke ongele, oshigwana tashi ka pitike aanambelewa mboka ya pombele omagumbo gawo. 

Kansela okwati, okupombelwa ohaku ningwa omvo kehe , pethimbo ndika lya hugunina lyokomumvo, oshoka olyo ethimbo omvula hayi tameke okuloka, mpoka oowe hadhi kala odhindji.

Ta ti, nonando omagumbo agehe ga kala haga pombelwa omimvo dhayi, shoka osha lunduluka omolwa omatompelo ge li po.

“Otandi indile oshigwana shi longele kumwe naanambelewa mboka,” ta kumagindha.   

Uutoni okwa ti, omiti ndhoka handhi pombelwa inadhi nika oshiponga, no handhi kalamo ashike ominite 20-25, omanga megumbo inamu yiwa.

Ngoka taka kala ena omalimbililo kombinga yaanambelwa mboka, na ndhengele koombelewa yelelo lyondoolopa yaNgwediva.